Nê kurdê ma yê zanayeyî hinî wa xo biyerî, hinî beranê / eser xo ziwanê maya xo de bivejî, hinî fek ziwanê xerîban ra ver ra dî, hinî bes o ziwanê xerîban ra xîzmet kerdo. Hinî xo tadî eslê xo. Agêrayîşê eslê xo ziwanî ra dest bide keno. Hinî zanayeyê ma ziwanê xo ra xîzmet bikerî. Wa zanayîşê xo ziwanê maya xo de îfade bikerî.Mesela doktor gureyê xo de eke xebatê ey ê zanistîyî est î ganî nê musayîşê xo yê zanistîyan ziwanê maya xo de bido nuştiş, bido çapkerdiş. Rayna ê ke akademîsyenî, zanistê pozîtîfî û zanistê komelî de xebatanê erjayeyî kenî ganî ê zî tîya ra pey beranê xo ziwanê xo de weşanî.Hele oldarê ma, hele ê ke sey akademîsyenan zanîngehan de xebitîyenî ganî ê tesil ziwanê kurdî de xebatanê xo biramî. Eke ê nêwazenî ziwanê înan bihelîyo, vînî bibo, o wext dest bi xebatanê xo kurdî bikerî. Heyanê key oldarê ma erebkî ser ro bixebitîyî. E, erebkî bimusî, xo aver biberî la kam ziwanê xo aver bibero.Kê ziwananê xerîban musayîşê berzan de aver biberî, xeyret bikerî la ziwanê kê bilikan de şîro û kê xem nêkerî. No feraset xelet o. Ferasetê ma de heme ziwanî rûmet î. La ziwanê maya kê hele ziwanê kurdî baro ke kê xurt bikerî. Oldarê ma cigêreyîşanê xo bikerî û beranê xo ziwanê xo de weşanî. Hewce bikero açarnî ziwanê xerîban ra zî. Ziwanê kê eynê sey olê kê erjaye yo.Kê kam mîletî ra biewnî, mensûbê nê mîletî ziwanê xo ra fek ver ra nêdayî. Dormeyê ma de mîletê ereb, faris û tirkî est î. Nînan ra kamî ziwanê xo ver ra dayî, şîyî sewbîna ziwanan bander bîyî. Nînan ra kamder oldarî vatî willa olê ma erebkî nusîyayo nê semedî ra ma ziwanê xo ra fek ver ra dî, ma erebkî bander bibî? Raştîkî ra na hawa çî vato? Ney. Olî ra vejîyayî? Ney. Gune kerdî? Ney. Şonî cehenim? Ney. O wext oldarê ma çi vindenî? Hinî karanê xo yê zanistîyî ziwanê xo de bikerî. Têkilîya şarî de ziwanê xo bixebitnî. Şarî rê raştîvatişî de kurdî bivajî. Xeyr û sewab o yo ke ziwanê şarê xo hewanî pay ra. Mîlet cîyayîya xo reyde weş o û cîyayîyan de serek ziwan o.Ziwan nuştişî reyde aver şono û no gure zî ê ke waneye / wende yî, ê ke roşnvîr î, mildê înan de yo. Nê wendeyê ma xora nusenî û xebatanê xo yê zafênê nuştişî reyde anî ca. Nê nuşteyanê xo şênî ziwanê maya xo de zî biyerî ca. Hinî no îmkan est o. Eke ziwan nusîyeno, o wext ganî yo, eke ziwan nusîyeno, çew nêşêno vernîya ey bigêro. Eke ziwan nusîyeno, o wext herra Mezopotamîye de sey royanê Dîcle û Feratî coş û vengî reyde herikîyeno. Hende ke şîpî reyde herikîyeno ke bendawî havil nêkenî. Nuştiş ziwan o, ziwan şarê bi xo yo.Ka yew vajor est o, vanê ke; ‘vate firreno, şono, vînî beno la nuşte maneno.’ Raştîkî ra zî nuştiş gureyêko zaf muhîm o. Û kê zanenê ke nuştiş şarî ra nêwazîyeno. Deyê mildê wendeyan û roşnvîran o ke ê binusî.
Zerweş Esnaw