Komîserê Berz ê Heqanê Mordeman ê Neteweyê Yewbîyayeyî (NY) Zeyd Raad el Huseyîn ke bi wesîleyê Roja Heqê Mordeman ê Dinya mesajeke weşîna, rîwalê qiseyanê ke ser îdamî yenê kerdiş, AKP û Erdoganî rê nêrazîbîyayiş damûsna.
El Huseyînî bê ke nameyê ci bido, AKP û Erdogan ke vengdayîşê îdamî kenê rexne kerd û vist vîrî ke ronayişê tayî komanê çeteyan yê Sûriye de polîtîkayê tayî 'dewletan' diyarker ê.
Zeyd Raad el Huseyîn vist vîrî ke rîwalo ke Beşar Esadî goş nêda nêrazîbîyayişanê ser îxlalkerdişê heqhe mordeman, herbê mîyanî vejîya û îşaretê rolê welatanê cîranan kerd. El Huseyînî dîyar kerd ke cayo ke herbî biqedînê, tayî welatan herbî hona jêde sûr kerd, yardimê kiştoxan kerdî, tifing û cesaret day radîkalan.
Tehdîdê îdamî
Komîserê Berz ê Heqanê Mordeman ê Neteweyê Yewbîyayeyî (NY) Zeyd Raad el Huseyînî hayr ant tehdîdanê îdamî ke dîktatorê Tirk Erdoganî vistiyo rojdem ser û wina va: “Tayî dewletî wazenê cezayê îdamî newe ra peyser bîyarê. Tayî cayan de zextî pawitoxanê heqê mordeman ra yenê kerdiş, yenê tometkerdiş, nûmayişkarê sîyasî û rojnamegerê cipersyayox ê ke wazenê raştîyan bivînê ya zî heqanê mordeman bipawê yenê tepiştiş û kiştiş.
Zeyn Raad El Hûseyînî aşkere kerd ke bi wesîleya Roja eqê Mordeman ê Dinya iyê dê kampanyaya bi nameyê “Ewro heqê kesekî bipawe’ destpa bikerê û va, ‘Hinî wext ameyo ke ma bikewê hereket. El Huseyînî veng da civaka sivîl ke wayîrê heqê mordeman bivejê.
CENEW