Şero ke 50 serrî yo ke mabênê hukmatê Kolombîya û rêxistina FARCî de bîyêne de nizdîyê 200 hezar merdimî merdbîy û no şer 2016 de pêvînayîşo ke paytextê Kuba Havana de virazîya, biaştîye netîce bî. FARCî hukmatê Kolombîya reyde Peymana Aştî viraşt û FARC do 1ê Êlule Roja Aştî ya Dinya de bikewo sîyasetî mîyan. Nameyê partîya ke FARC awan bikero û programê ci dîyar nîyo. Rojnameger û nuştox Metîn Yegînî derheqê nê prosesî de qisey kerd.
Yegîno ke pisporê sîyasetê Amerîkaya Latîne yo, bale ant proseso ke Tirkîya de ame xirakerdiş ser û wina va: “Eke dewleta tirk zî peymane îmze bikerdêne, ewro do Rojhelato Mîyanên de bibîyêne dewleta bihêz.”
Qerardarîya înan nimûne ya
Yegînî va ‘mîyanê 4 serranê muzakereyî de FARCî çend reyan adirbest îlan kerd’ û wina domna: “Qerardarîya înan estbîye û qet masa ra nêweriştî. Seba ke nêweriştî ewro peymane ameye îmzekerdiş. Aştî pêşkêşî referandûmî bîye û referandûm de ameye redkerdiş. Peynîya peynî peymane kewte dewre û sîlehî ameyî teslîmkerdiş. FARC do bikewo meclîs.” Yegînî ard ziwan ke ‘prosesê muzakere yê înan bi hawayo aşkere ame viraştiş’ û wina va: “Labelê Tirkîya de çîyêk dîyar nîyo. Wexto ke ez ewja de beşdarê Kongreya FARCî bîya, eke Erdoganî ewja bidîyêne do prosesê aştîye xira nêkerdêne. O firsend destê Tirkîya ra rema.”
DÎHABER/STENBOL