Pêşmergeya verêne Nermîn Hisêne qala tecrîdo giran ke Rayberê Şarê Kurdî Abdullah Ocalanî ser o esto, kerde û wina va: “Ocalan seba çar parçeyê Kurdîstanî têkoşîn dano û ameyeyê kurdan o. Ganî heme kurdî biwerzyî payan ser û azadîya Ocalanî biwazî.”
Rayberê Şarê Kurdî Abdullah Ocalan nizdîyê 20 serrî yo ke şertanê giranan yê Girawa Îmrali de yeno tepiştene û nizdîyê 3 serrî yo zî ti xebere tira nîna girewtene. Destûr nêdîyeno ke Ocalan bi keye, avûkat û Heyetê Îmrali reyde pêvînayîş bikero.
Vera tecrîdî de etirîyayîşê kurd û dostê kurdan zêdeyeno. Vera tecrîdo giran de tewir bi tewir çalakîyî yenî viraştene. Bitaybetî Ewropa de kurd û dostê kurdan payan ser o yî û çalakîyanê cîya-cîyayan virazenî. Nînan ra yew zî çend rojî verê ciwanê kurd Ûmût Acarî seba protestokerdişê tecrîdî xo veşna.
Pêşmergeya verêne Nermîn Hisêne vera tecrîdî de reaksîyon nîşan daye. Nermîn Hisêne daye zanayene ke Ocalan ameyeyê kurdan o û ganî heme kurdî seba azadîya Ocalanî têkoşîn bidî. Nermîn Hisêne va ‘Ocalan şexsîyetêko şorişgêr û serkewte yo’ û wina dewam kerde: “Ocalan şexsêko rayber o û girêdayeyê şarê xo yo. Wexto ke Ocalan tepişîya, xeylê çalakîyê girdî ameyî viraştene. Eke Ocalan azade bibîyêne, o wext bi hezaran fikirê azadî aver şîyêne. Fikrê Ocalanî dişmenî tersnenî, cok ra dişmen tewqîfbîyayeyîya ci ra kêfweş o. Labelê dişmen nêşêno têkoşînê Ocalanî û yê şarê kurdî bivindarno.”
Wazenî mesaj bidî herkesî
Nermîn Hisêne va ‘wazenî bi tecrîdî mesaj bidî her kesê ke seba azadî û xoserîya Kurdîstanî têkoşîn danî’ û wina domnaye: “Labelê no nîno manaya vindetişê têkoşînê kurdan. Herçiqas ke tewqîfbîyayîşê Ocalanî zirar dayo kurdan, labelê reyna zî na rewşe bîya sebeb ke kurdî têkoşînê xo berz bikerî.”
Nermîn Hisêne qala xusûsîyetanê Ocalanî kerde û wina va: “Ganî heme kurdî bibî yew û pîya seba azadîya Ocalanî têkoşîn bidî. Ocalan tena seba Vakurê Kurdîstanî nêxebetîyeno, seba her çar parçeyan têkoşîn dano. Ganî ma rêxistinanê mîyanneteweyîyan ser o zextan bikerî. No zî ancax bi çalakîyan beno. Ganî şar biwerzîyo payan ser û azadîya Ocalanî biwazo. Tayê rayberî emrê xo mîyanê îxanetî de derbaz kenî. Labelê Ocalan heta nika qet wina nêkerd û nika zîndan de yeno tepiştene.”
Ocalan do rojêk azade bibo
Nermîn Hisêne peynîya qiseykerdişê xo de wina va: “Ocalan ameyeyê kurdan o. Ocalan do rojêk azade bibo û ma zî do zaf kêfweş bibî. Ocalan seba ma ameyeyêka roşne yo û ma do hertim rayîrê ci de şêrî.”
ROJNEWS / SILÊMANÎ