Dewletekê de hetanê polîtîka tersdayişî bibo, a dewlete de zilm û zordarî, qirkerdiş û talankerdiş, rewşê OHALî zî dewam keno. Tirkîye de zî rewş eynî yo. Bîyayişê tirkan ra heta na gamî heme polîtîkayê înan de tersdayiş, zilm, talan û qirkerdiş, zûreştiş û tiritiş esto. Gelo cayo ke tersayiş esto de ilim û îrfan, teknolojî û averaşîyiş beno? Nêbeno.Çimkî mezgê şarê ci de verê karkerdiş û karnayişî de polîtîkayê tersayişî vindeno heta ke no qalip nêşikyo veng o. No semedî ra, şar semedo ke raştê zilmî nîro û veyşaneyî ra nêmiro xoverdayişê domdarnayişê cuyê xo dim de geyreno. Heta cayeke sînorê sebra şarî esto.
Qiralo rût Erdogan
Semedê polîtîkayê dewleta Tirkîye gemar û kevza qilirêne tepişto OHAL ameyo îlankerdişî. Edî şar nêşkeno boya xo bigero û sebir bikero. Qiralo rût Erdogan bi fîlm û firildaqêy xo derbe viraşt û OHAL îlan kerd. Him wazeno ters bido şarî û him zî wazeno ke, çimê şarê ke Tirkîye de cuyenê xo biko ‘qehremaneke’! 15ê Temmuz de şarê Tirkîye û yê ke pêrokîn dinya de cuyenê çend saetan ra kurtefîlmekê temaşe kerdî. La no kurtefîlm eke wina bişêro do bibo pîrebotkê hewnê şarê Tirkîye. Goreyê texmînê mi, Erdoganî bi lejkeran kombîyayiş viraşt û bi her hawayî talûkeyo ke Tirkîye cuyeno û qedîyayişî verde ya, ardo ziwan ke mecbûrî senaryoyeke kurtefîlmî gere bêro hadrekerdiş û kaykerdişî.
‘Kutik goştê kutikî nêweno’
Senaryo hadre bi û 15ê Temmuz de ame kaykerdiş, hetê lejker û polêsan bi seyan merdimê xamûtam cuyayişê xo vinî kerdî. Tikey senarîstî maxsûs, tikey zî bi destûra Erdoganî ke qeyîdeyî cayê cira amey leqnayiş û fermandarê ke qirkerdişê kurdan kerdbî ke her yew delîleke yo, hemeyan eşt tepiş û zafêr zîndanî de yê. Yanê Erdoganî fîlmî mîyan de fîlm bi leşkeran da çarnayişî. No semedî ra zî ewro tikey leşkerî remayî Yewnanistan û cayanê bînan. Her çi beno wa bibo vajîyeno; ‘kutik goştê kutikî nêweno’ no semedî ra zafêreya derbekaran iyê dê vatişê Erdoganî bîyarê ca û serbest bêrê veradayiş ke qirkerdişê kurdan dewam bikerê.
Ocalanî ra xeber çîna
No kurtefîlmî de rewşê Rayberê Şarê Kurd Abdullah Ocalanî ra qet xeber çîna û sebra şarî keno ke çilkê xo yê peynî birijno. Çimkî senaryoyî de teyare û helîkopteran bombe eştî meclîsî û polêsan. Beno ke çîyeke ardbê Birêz Ocalanî ser de zî! Şarê kurd, HDP û PKK bi lez û bez waşto ke pawitox û malbata Birêz Ocalanî pêra pêdîyayişî virazê. Na xala ke zelalî nêbî bi OHALî manîpule bi. No hal haleke bîn û gunaka estbîyayişê Birêz Ocalanî hewna zî bi qiwet kerdo. Meclîsî de Sirri Sureya Onderî qala Birêz Ocalanî kerd, qaşo wekîlî werzîyayî payan ser û nêverday ke Onder qise bikero. No bertekê wekîlan gumarê derheqê Birêz Ocalanî de girdî girdî. Heta na gamî bertekêko winayine nêamebi nawnayişî. Wa heme kesî bizanê ke OHAL semedê estbîyayişê kurdan lawaz bikerê ra rayêko bîn OHAL îlan kerdê. Lazim o heme kurdî her wextî ra zafêr bi hay û bi guman bibê ke estbîyaye ya cuyokraştîya paradîgmayê xo bipawê.
EHMEDÊ BIRA