Tecrîdo girankerde ser Rayberê Şarê Kurdî Abdullah Ocalanî de dewam keno. 27ê temuza 2011î ra nata avûkat, 5ê nîsana 2015î ra nata zî Heyetê Îmrali û teşebusê derbeya 15ê temuza 2016î ra nata zî keyeyê Ocalanî nêşênî şêrî pêvînayîşê Ocalanî. Babete ser o Hemsereka Kantonê Cizîrî Hêva Ereboye qisey kerde.
Hemsereka Kantonê Cizîrî Ereboye va ‘demêko derg o ke têkilî Ocalanî reyde ameya birnayîş’ û wina dewam kerde: “Ser îradeya şaran de hêrişêko gird esto. Wazenî tecrîdî reyde îradeya cinîyan û têkoşinê azadî bişiknî. Şarê ma Rojawanî ra heta heme parçeyanê Kurdistanî de vera tecrîdî de reaksîyonê xo nîşan dano. Bitaybetî cinîyî heme waran de seba wedarnayîşê tecrîdî xover danî.”
Heme berpirsîyar î
Ereboye dewamê qiseykerdişê xo de va ‘tena fikrê Ocalanî eşkenî krîzê çareserîya Rojhelato Mîyanênî çareser bikerî’ û wina domnaye: “Ganî çareserîya ke Ocalanî seba krîzê Rojhelato Mîyanênî pêşnîyaz kerdo, bêro esasgirewtiş. Tena Tirkîya nê heme hêzê hemkarî tecrîdî ra berpirsîyar î. Her çiqas ke hende zext û zordarîyî estî, reyna zî Rayber Apo îradeya şaran şexsê xo de temsîl keno û çareserîya probleman de kilîtê çareserî yo. Projeyê ke Ocalanî pêşnîyaz kerdî, ewro Rojawanê Kurdistanî de kewenî pratîk. Rojawan de vejîya orte ke tena rayîrêk esto ke şarî bi hawayo seyyewbînan cuya xo bidomna, aye zî fikrê neteweya demokratîk a.”
Fikrê sesseran o
Ereboye qiseykerdişê xo de dîyar kerde ke tena bi esasgirewtişê sîstemê neteweya demokratîke merdim şêno problem çareser bikero û wina va: “No zî bingeyê xo felsefeya Rayber Apoyî ra gêno. Ewro kesê ke dinya de namdar î, wayîrê Rayber Apoyî vejîyenî û vanî ‘no îdeolojîyê seserran o’. Tayê dewletê ke Rojhelato Mîyanên de yî, hegemonyaya xo de israr kenî, dewletê girdî zî wazenî ewja de xo bica bikerî. Mabênê nê hêzan de şerêko gird esto û dirîtîya sîstemanê hakimî estî. Nê hêzê hegemonîkî bi îdîaya dagîrkerî yenî herême û qezencanê şarî dîqet nêgênî û dagîrkerîya moderne aver benî. No zî beno sebeb ke Rayber Apo tecrîdî reyde rî bi rî bimano.”
Tirkîya têk şona
Ereboye qiseykerdişê xo de bale ante hêrişê ke Vakurê Kurdistanî de merkezê cinîyan ser de benî ser û wina va: “Hêrişê ke îdarekar û rêxistina cinîyan de benî zî parçeyêka nê planî ya. Tirkîya de zîhnîyeto şovenîst têk şono. Dewleta tirke vakur û rojawanê Kurdistanî de polîtîkayê înkar û îmha eştî dewre. Ganî no bêro zanayîş; şarê kurd tarîx ra nata tim bi xoverdayîşê xo serkewto. Ti hêz nêşêno dûşto ke cinîya kurde resaya, têk bîşêro.”
Hêwaye qala polîtîkayê ke vera Qatarî de yenî xebetnayîş kerde û wina va: “Tirkîya hetê mîyanneteweyî de tena mende. Tirkîya xo eşte dafika hêzanê girdan. Tirkîya vindetişê xo yo vera Qatarî de xo bi xo qedênaye. Êdî şarê Tirkîya zî vera sîyasetê AKP û Erdoganî de reaksîyon nîşan dano. Ganî çîyê ke benî, bêrî teşhîrkerdiş. Ganî vindetişê ma vera xeta îxanetî de zelal bibo.”
RÛKEN GOMAN/ŞÛJIN/GIRKÊ LEGÊ