Rayberê Şarê Kurd Abdullah Ocalan ke Girawa Îmrali de binê tecrîdêko girankerde de yeno tepiştiş, ey ra 11ê êlula 2016î ra nata ti xebere nîna girewtiş. Tewr peynî medyaya komelkî ser ro tayê xeberê ke merdişê Ocalanî ser o ameybî vilakerdiş û dima ra partîyê sîyasî û dezgehê eleqederî seba ke melumat bigîrî, waştbî ke wa pêvînayîşî bibî.
Babete ser o Hemserekê HDPyî yê Stenbolî û Avûkatê Rayberê Şarê Kurd Abdullah Ocalanî Cengîz Çîçekî qisey kerd.
Çîçekî va ‘roja tewqîfbîyayîşî ra nata şert û mercê Ocalanî de bedilîyayîşê girdî nêbîyî. 18 serrî yo ke binê tecrîdêko girankerde de cuyeno. Ewro xebera avûkat, keye û heyetanê xoseran Ocalanî ra çin a. Seke yeno zanayîş Ocalanî verê cû vatbî ‘Îdam 3 deqa dewam keno, labelê ez tîya de her roje û her vîste de yena îdamkerdiş. Ez tîya de her vîste de bênefesîya mergî cuyena’. Herinda Ocalan kamcîn şert û mercan de cuyeno ra zêdeyêr, ganî merdim pers bikero sîstemê tecrîdî yê Îmrali goreyê kamcîn zîhnîyetê awan bîyo.”
Tena Ocalan eşkeno şerî biqedêno
Çîçekî va ‘Îmrali de polîtîkaya esîrîye yena caardene’ û wina domna: “Herçiqas ke 18 serrî derbaz bîyî, labelê reyna zî dewlete hemleyê ke tesîrê Ocalanî yê şarî ser de ceribnenî, ano rojeve. Wexto ke 2010 de gardîyanî Ocalanî tehdît kerdbî, şar vejîyabî rasteyan. Tecrîd seba ke Ocalanî şarî ra biqerfnî, yeno meşnayîş. Ewro demokratîkbîyayîşê Tirkîya û Rojhelato Mîyanênî ancax bi fikrê Ocalanî mumkin o. Ewro Ocalan bîyo rayberê heme bindestan. Seba qedênayîşê şero ke Rojhelato Mîyanênî ti fikrê dewletan çin o. Ewro yê ke bişînbo şerê Rojhelato Mîyanênî biqedêno, Birêz Ocalan o.”
Çîçekî qiseykerdişê xo wina qedêna: “Ocalan seba ke 1999 de kayanê sîstemê kapîtalîzmî xira kerdêne ame hepiskerdiş, ewro zî seba ke Rojhelato Mîyanên de rolê awankarî keno, tecrîd yeno meşnayîş. Ewro HDP bi mîlyonan reyan gêno. Wayîrvejîyayîşê Ocalanî wayîrvejîyayîşê partîya xo yo. Senî ke dewlete wazeno şaran bêvîr bikero, ganî ma zî vîrê xo newe bikero. Ganî ma her wextî ra zafêr wayîrê Ocalanî bivejyî.”
MA/STENBOL