Temsîlkarê Partîya Sosyalîst yê bindestan yê Awrûpa Zîya Ûlûsoy ke 19 serrî girotxaneyanê Tirkîye de mend hayr ant şert û mercanê Rayverê Şarê Kurd Abdullah Ocalanî ser û vist vîrî ke Ocalan lîderê şarekî yo. Ûlûsoyî aşkere kerd ke Wezareta Edalet yê Tirkîye aşkere kerd ke ‘dirûmê ci rind o’ la no bes nêkeno, eke rindo se çima nêdanê musnayen.
Pêdîyayin heqekê hiqûqî yo
Temsîlkarê ESP da zonayen ke serrekê nîm o ke Ocalan bi malbat û pawitoxanê xo ra pênêdîyeno û wina va: “Pêdiyayişê Ocalanî bi pawitoxanê xo heqekê hiqûqî yo, la çima yeno manîkerden? Ma wazenê nay bizanê. Hendê weşîya Ocalanî ciwîyayişa ci zî muhîm a. Çike Ocalan kesekê rêzî nîyo, lîderê şarekî yo. Tecrîdê verra Ocalanî tîpê F ravêrna. Ocalan herkesî ra vêşêr bin tehdîtî de yo. Ma pêrokînî girotxaneyanê tîpê F de hedefê şoreşê hemverî de bî. Ocalan serva înan hedefekê hona girdêr o. Şarê kurd bi nûmayişanê xo heta nika wayîrê rayverê xo vejya, la neyra tepya ganî nê nûmayişî hona girdêr bê.”
Zîya Ûlûsoy vist vîrî ke Ocalan tenya serva şarê kurd nê, serva serbestîya pêrokîn şaranê bindest tekoşîn kerd, emeg da û da zonayen ke sîyaseta Ocalanî ya derheqê jûbîyîna azad, kehanîya herem û dûştê emperyalîzmî serva şaran zaf muhîm a.
Ocalan sîmgeyê şaranê heremî yo
Ûlûsoy da zonayen ke Ocalan sîmgeyê şaranê heremî yo û waşt ke pêrokîn şarî wayrê Ocalanî bivejyê. Temsîlkarê ESP yê Awrûpa hayr ant tekoşîna pîyayî ser û qiseyanê xo wina domna: “Senî ke ma Rojawa de pîya herb kenê, tîya de HDK û HDP ra pîya tekoşî kenê û senî ke dûştê êrişanê faşîst yê Erdoganî pîya danê piro se eynî meydanan de dûştê faşîzmî û dûştê tecrîda Ocalanî ganî pîya tekoşîn bikeme. Ocalan ra pîya ganî serva serbestîya pêrokîn tepişteyan tekoşîna pîyayî bidime.”
Zîya Ûlûsoy da zonayen ke AKP û Erdoganî rê emel nêkenê û wina va: “Na îxtidarî rê bawerî nêbeno. Nayî ra şert û mercê Ocalanî dê bi tekoşîna ma bîrê raştkerden. Ganî her ca de serbestîya Abdûllah Ocalanî qîrbikeme. Ez bi xo zî 19 serr girotxaneyan de menda. Goreyê mi raya serbestîya pêrokîn tepişteyan serbestîya Ocalanî ra vêrena ra. Nayî ra ganî herkes bivejyo kuçeyan.
ANF/BRUKSEL
Tekoşîna pîyayî
Dûştê tecrîsa ser Rayverê Şarê Kurd Abdullah Ocalanî jû nêrazîbîyen zî Platformê Waûbirabîyena Şaran û Jûbîyena Karkeran (BÎR-KAR) ra amê. Temsîlkarê BÎR-KAR Sînan Yildizî hayr ant rewşê Ocalanî ser û aşkere kerd ke waştena serbestîya Ocalanî waştenekê heqdar û rewa ya.
Yildizî hayr ant herb û êrişanê AKP û Erdoganî yê dûştê şarê kurd ser û aşkere kerd ke zalimtî û wehşetî de sînoran nêsilasnenê. Yildizî da zonayen ke ne hikûmet ne kî cemaat heqanê kurdan nêsilasnenê û va pîyakarîya hurdîyan qedîya la dûştê kurdan de herbê qilêrîn rameno.
Erdoganî ferman da
Temsîlkarê BÎR-KAR Sînan Yildizî aşkere kerd ke Tirkîye de nika Osmanijîya newî ronîyena û serkeşîya nayî zî Erdogan keno û wina va: “Badê derbe destpa istanikan kerdî. Vanê ‘heme çî derbekaran kerd’. Rind o la şima dê sebikerê? Şima dê na herb vinderdê? şima dê hesabê hendayî gonî, zilm, qetlîam û îcadanê tarî bidê? Badê Roboskî Erdoganî va ‘mi ferman da’. O ke ‘maseyê muzakere hewada’, o ke va ‘meseleya kurd çinya’ û kêberan girot Erdogan bi xo yo. O ke qeymeqaman rê va ’mewzûatî ca verdê, çi hewce keno ey bikerê’ û ‘Ya xendekan gênê ya zî ma înan dekenê xendekan mîyan’ reyna Erdoğan bi xo yo. Heqê destnêdayişê parlementeranê HDP bi fermanê ey yenê wedarnayen.”
Yildizî vist vîrî ke îzolasyon û tecrîdê giran yê Îmrali zî bi fermanê Erdoganî yeno ramiten.
Sînan Yildizî waşt ke desinde tecrîd û manîkerdişê pêdîyayişê dûştê Ocalanî wedarîyo û va serbestîya Ocalanî waştenekê heqdar û rewa ya. Yildizî aşkere kerd ke Tirkîye û qadanê mavên netewî de ganî tekoşîn û gureyînê wedarnayişê tecrîdî û serbestveradayişê Ocalanî heta ke netîce bigîrê dewam bikerê.
Yildizî hayr ant tekoşîna pîyayî yê şaran ser û va serbestîya raştîn yê şarê kurd û pêrokîn şaran bi tekoşîna pîyayî yê tebeqeya emegdar bena. Yildizî da zonayen ke zey Platformê Waûbirabîyena Şaran û Jûbîyena Karkeran iyê dê her tim poşt bidê tekoşîna şarê kurd.
ANF/WUPPERTAL