Seroka Wekîlê Koma HDP Pervîn Buldan derheqê îdiayê pêdiyayinê Îmrali de qisey kerd. Buldan va, parlementerê AKP Galîp Ensarîoglu derheqê Ocalan’î de zûran keno. Buldan ard ziwan ke, Ocalan, serva ameyina Tirkiye, aktorê do zaf zaf muhîm o. Û Ard ziwan ke tenya ternayinê aktorê winayîn û tecrîdkerdinê ci, zirarê tewr gird dano Tirkiye.
Buldan pêrokîn Kurd û quwetanê demokratîk ra wast ke verra tecrîd û zûranê AKP, werzê ser pay. Îdiayê parlementerê AKP yê Amed’î Galîp Ensarîoglu yê zey “Ocalan û dewlet pêdiyayinan virazena” raştê nêrazîbiyenan amê. Aza ya heyeta HDP ê Îmrali û Seroka Koma HDP Pervîn Buldan derheqê îdiayanê Ensarîoglu de qisey kerd û va; “Ensarîoglu bi zanabiyen zûran keno.
Wazenê verniya nêrazîbiyenan bigîrê
Buldan ard ziwan ke mabenê Ocalan û dewlet de pêdiyayinî nêviraziyenê. Buldan wina dewam kerd: Dewlet verniyê pêdiyayinan gêna. Ensarîoglu bi xo zî nay rind zano. La belê bi sebebo ke, verra tecrîdî nêrazîbiyenî benê zafî, wazenê bi zûriyanê winayîn, verniyê ci bigîrê. Buldan eleqe ant muhîmînê rolê Ocalan’î ser û vist vîrî ke, bi sebebo dewlet Ocalan dewre ra vet, bi seyan kesan weşiya xo kerd vinî û vat: Sebebê nay zî zihnîyetê lej ê AKP yo. Gerek dest de peyniyê qedexeyê kûçeyan û komkiştenan biyariyo, cecrîd hewado û muzakereyî destpa bikerê.
Ocalan aktorê muhîm o
Pervîn Buldan eleqe ant weşiya Rayverê Şarê Kurd Abdullah Ocalan’î ser û qaxû-endişeyê xo ardî ziwan: Birêz Ocalan, serva-qandê ameyina Tirkiye, aktorê zaf zaf muhîm o. Tenya ternayinê aktorê wina-niyayîn û tecrîdkerdinê ci, zirarê en zaf dano Tirkiye. Sermiyan, wezîr û parlementerê AKP bi vatenanê ciya ê derheqê Ocalan’î de, wazenê şaran bixapeynê.
Buldan vera zûranê AKP û dewleta Tirk veng da heme Kurdistanijan û quwetanê demokratîk ê Tirkiye: Roj rojê pay-weriştişo. Roj rojê piya veng vetişo. Eke heme quwetê demokratîk vengê xo vejê, peyniyê tecrîdo berê. Verniyê muzakareyan abiyo. Û eke quwetê demokratîk piya hereket bikerê, peyniyê zilmê AKP bêro.
DÎHA/STENBOL
Îmrali de pêdiyayin çinîyo
Pawitoxanê Rayverê Şarê Kurd Abdullah Ocalan’î ra Rezan Sarica zî, îdiayanê zûrî yê AKP rê nêrazîbiyen damûsna. Sarica va, sermiyanê AKP, wazenê bi zûriyan şarî bixapeynê.
Sarica vatenanê Ensarîoglu zey zûrî hesibina û va: Lazimo şar rast xeberdar bibo. Ma Îmrali ra muwekîlanê xora mektûban gênê. Nê mektûbî zûranê Ensarîoglu û sermiyananê AKP rafînenê ver çiman.
Haştî yeno tecrîdkerdin
Avûkat Rezan Sarica ard ziwan ke çi wext verra tecrîd nêrazîbiyenî bîyê jêde-vêşî, hikumeta AKP, zûrî vistê dewre û wina qisey kerd: Senî ke vînenê şar vera tecrîdî vengê xo keno berz, hikumet kesanê nezdiyê xo fîneno dewre. Bi raya înan zûranê zey, “dewlet û Ocalan pêdiyayinan virazenê” kenê vila. Bi nê zûran hewl danê, hometî-civakî şaş xeberdar bikerê û verniyê nêrazîbiyenan bigîrê.
Ocalan temînatê aştî yo
Rezan Sarica tecrîdê vera Ocalan’î, tecrîdkerdinê aştî hesibna û vat: Tecrîdê Îmrali de, teniya tecrîdkerdinê Ocalan’î niyo. O tecrîd açariyayo tecrîdkerdinê aştiyê Tirkiye. Kerdenê hetanî nika damûsnenê ke, Ocalan temînatê aştî yo. Cok ra lazimo dewlet raşt nezdiyê Ocalan’î bibo. Peyniyê tecrîdî biyaro û raya muzakereyan û çareserînê siyasî akero.