Endamê Meclîsê Taxê Uçkuyularê Yenîşehîrî yê Amedî Cebelî Akyol Komplo ser qise kerd. Endamê Meclîsê Taxê Uçkuyularî Cebelî Akyol verê qise xo vat ke o Komploya 15’ê Sibate şermizar keno û wina verdewam kerd: “Demo ke ma dîroka dinya ra biewnî, no demî komployê klasîk senî virazyeyî ma vînenî. Yeno vatiş ke dîrok bi Sumeran dest pê kena û sifte komplo zî sumeran de yeno vînayîş. Goreyê Destanê Gilgameşî, Humbaba şarê kurdî temsîl keno labelê bi hemkarîya Enkîduyî komployek yeno viraştiş. Badê ser şarê kurdî ser dewletê Mîtannî, Hurrî ancî hetê Persan ra zî bi hemkarîya Matîzawayî komplo virazenî. Dîrok de ona komployê klasîkî zaf î. Tewr komployê klasîkî demê Julio Sezarî de yo. Warezayê ey verba Julio Sezarî de komployek virazeno. Hewna Îbranîyan de bi silgîrîya fahîşeyek komplo yeno viraştiş. Îslamîyet de zî ser Ehlî Beytî komployo namdar ameyo viraştiş. Dewleta tirkî zî kurdan ser o bi qirkerdişê Dêrsim, Koçgirî û Şêx Saîdî komployan viraşta, çi heyf ke verba şarê kurdî dewleta tirkî, bi nê komployan ser kewt.”
Berê emperyalîstan
Endamê Meclîsê Taxê Uçkuyularî Akyol aşkera kerd ke dewleta tirkî verba kurdan komploya tewr gird, bi komploya 15’ê Sibate ya Mîyanêneteweyî hemverê Rayberê Şarê Kurdî Abdullah Ocalanî viraşt û wina dewam kerd: “Armancê na komplo, Rojhelato Mîyanên de têkberdişê AKP bî, çimkî emperyalistan zanenî ke Rojhelato Mîyanên de hêzo tewr gird PKK yo û bê PKK emperyalistî nêeşkenî projeyêk bivirazî. Waştê Rayberê Şarê Kurdî binê esaretî bigirî û PKK zî tasfîye bikerî û emperyalistan waşt ke Rojhelato Mîyanên de goreyê xo projeyan bivirazî. Emperyalistan belkî sifte ser kewtî, çimkî Rayberê Şarê Kurdî Abdullah Ocalan girewtî binê esaretî û no demî de 40 qadroyê muhîmî PKK ra cîya bîyî. Amerîka nê qadroyê muhîm girewtê binê bandorê xo.”Akyol ciresna ke yeno vîra ey, ê zîndan de bîyî û çapemenî de vejyayo ke her roj qadroyê PKK, yenî dewlete ra teslîm benî, ê zî fam nêkerdî nê qadroyê kam î yenî dewlete ra teslîm benî. Akyol îzeh kerd ke hemkarê ke PKK ra remayî, Amerîka pere reyde înan girewtbî û bi no hawa Amerîka waştînî Rojhelato Mîyanên de estorê xo bi rehetî bido kaykerdiş.
Xoverdayişê Ocalan’î
Akyol wina domna: “Rolê Rayberê Şarê Kurdî Abdullah Ocalanî zaf bi muhîm o, merdim dîroke ra biewnîyo no demî vîneno ke her neteweke de rayberek vejîyayo. No rayber ya Pêxamber bîyo ya zî mesîh bîyo la şarê kurdî bi şens bi ke Rayberê înan Abdullah Ocalan o. Hetanê nika birêz Ocalan rolê xo kay kerdo. Binê esaretî de daxî birêz Ocalan xoverdayîşê xo ra fek veranêdayo. Birêz Ocalan yew pêvînayîşê xo de vano ke ez zî eşkîyaynî zey çalakîya Mazlum û Hayrîyan xover bida la min waşt na projeya tasfîyeyî têk bêra û na komplo veng bivejna. Xora birêz Ocalan na komplo bi xoverdayîşê xo veng vet. Çi heyf ke na komplo hema zî domyena. Yew vatiş esto ‘Osmanijan de kay nêqedîyeno.”
LÊL AMED / AMED