HENAN MIHEMED / ANHA / HELEB
Bi nameyê Ehmed Cafero 60 serrî ke Taxa Şêxmeqsûdî ya Helebî de cuyeno, serra 1982î de wexto ke Lubnan de leşkerîya rejîmî keno, felsefeya Rayberê Şarê Kurdî Abdullah Ocalanî şinasneno. Cafer 1988 de grûbêka sivîlan reyde Taxa Seyîf El Dewlê ya Helebî de Ocalanî vîneno û ey reyde pêvînayîşêk keno.
Cafer dîyar keno ke şexsîyet û tarzê Ocalanî moralêko pîl dayo ci û wina vano: “Mi pêvînayîşo yewin de moralêko pîl girewt û mi fam kerd ke gerek ez deynê xo yê şehîdan bida. Ocalanî derheqê têkilîyanê hemratî de tayê çîyan neqlê mi kerdî û mi ra va ‘Ruhê hemratîye ganî goreyê biratîya şaran û peymeyê demokrasî de bêro awankerdene’ û Ocalanî qala muhîmîya resayîşê heqîqete kerde.”
Caferî dewamê qiseykerdişê xo de vano ‘badê ke mi Ocalanî reyde pêvînayîş viraşt, mi israrê ci yê resayîşê amancan fam kerd’ û wina domneno: “Ey têkilîyanê xo goreyê resayîşê amancê azadîye awan kerdêne. Pêvînayîşî têkoşîn de mi ser o zaf tesîr kerd. Çimkî ma fealîyetanê xo bi hawayo nimite kerdênê. Amancê min o tewr pîl xo şinasnayîş û resayîşê azadîye yo.”