Welatê Awrûpa nê rojan de şahîdîya nûmayişanê kurdan û dostanê ci kenê. 70 dostê kurdan bi waştena serbestîya Ocalan û statuyê Kurdistan Luksembûrg ra vera Strasbûrg şinê. Herzewbîn welatanê Awrûpa yê zey Almanya, Fransa, Hollanda, Awûstralya ûsb. de meşê 3 rojeyî zî virazîyenê.
70 nûmayişkarê enternasyonalîstî ke welatanê zey Îtalya, Şîlî, Ûrûgûay, Portekîz, Arjantîn, Bask, Swêd, Brîtanya, Danîmarka, Swîsre, Belçîka, Hollanda, Fransa, Almanya û Îspanya ra Luksembûrg de are bî,1ê Sibate de bi slogananê “Bicuwe Serok Apo” destpa meşa 258 kîlometreyî kerdî.
Seba Ocalanî bikewê hereket
Nûmayişkaran Luksembûrg de ver Dîwana Edaletî yê Awrûpa de îzahatekî startê meşa dergî day. Îzahatî de wazîya ke PKK ‘Lîsteyê Terorî’ ra bîro vetiş û veng dîya welatanê Awrûpa ke seba serbestîya Ocalanî bikewê hereket. Nûmayişkarî dê 10 rojan mîyan de veng bidê sazgehanê zey Yewîya Ewropa, CPT ke seba hol/rinderdişê şert û mercanê Ocalanî bikewê hereket. Herzewbîn wextê nûmayişî de dê bi xêlê sazgeh û rêxistinan pêdiyayişan virazê. 10 rojan ra dima nûmayişkarî dê 11ê Sibate de tewrê mitîngê protestoyî yê Strasbûrg bibê.
Kurdî tenya nîye
Ser nameyê heyetê Portekîzî Susanne Gomes roja sifte yê nûmayişî de qisey kerd û aşkere kerd ke bi na nûmayişî ê wazenê ke paştdayişê xo yê seba tekoşîna şarê kurd damûsnê. Gomes herzewbîn vist vîrî ke ê seba ke rexnekerdişê polîtîkayanê Yewîya Ewropa yê vera kurdan, seba îqazkerdişê Parlamento û Konseyê Awrûpa tewrê nûmayiş bîyê. Nûmayişkara Portekîzij vist vîrî ke Şoreşê Rojawa îlhamê xo Ocalanî ra gêno û waşt ke Ocalan hetê fizîkî zî serbest bibo. Julîa Garsîa ke ser nameyê heyetê Arjantîn qisey kerd zî hayr ant qetlîamanê vera Kurdan ser û va Kurdî tenya nîye, zerrîya ma bi Kurdan erzena. Koma 15 kesan yê Almanya ra zî nûmayişkar Felîxî qisey kerd û veng da hikûmeta Almanya ke nêbê wertexê şerê qilêrîn yê Tirkîye. Felîxî waşt ke hikûmeta Almanya polîtîkayanê dişmenîya Kurdan biqedîno û qanûna 129b hemverê Kurdan nêşixûlno.
Qedexeyê vera PKK wedarnê!
Sezaî Ûçarî vist vîrî ke nûmayişî de xêlê welatanê cîya yê dinya ra aktîvîstî estê. Zerreyê nînan de pawitox, wendekar, doxtor û rêxistinanê civaka sivîlî ra temsîlkarî estê. Ûçarî hayr ant muhîmîya nûmayişî ser û wina va: “Bi Komployê Mîyanneteweyî waştî ke şexsdê Rayver Apo’yî de Hereketê Xelesnayişê Neteweyî yê Kurd tesfîye bikerê. La nêresay hedefê xo. Armancê na meşî zî protestokerdişê eno komployî û berzkerdişê waştena azadkerdişê Rayver Apo yo. Eleqeyekê gird esta. Ma bawerî kenê ke ma dê bi enê nûmayişan netîce bigîrê.
Nûmayişê Kurdistanijan bi xeta Luksembûrg-Strasbûrg ra bi sînor nîyo. Herzewbîn Almanya, Swîsre, Fransa, Hollanda, Awûstralya de zî bi desan hereman de meşê 3 rojeyî zî virazîyenê. Bi seyan nûmayişkarê ke tewrê nê nûmayişan benê yew hetî ra Komployî protesto kenê, heto bîn ra waştena serbestîya Rayverê xo qîr kenê.
NAVENDÊ XEBERAN