Hemverê nê hêrişan heta nika hetê îdarekarê dewletî ra ti îzehet an zî şermizarkerdişek nêame ziwan. Wextê ke nê hêrişan de kesêy ke hêriş organîze kerdê û kesêy ke beşdar bîynê engiştanê xo sey sembola MHPe kerdê. Babete sero MHP îzehet da û vat ke ti eleqeya ma nêy hêrişan rey çino. No îzehetî sero nameyê Ocaxê Osmanî vecyay vernî.
Goreyê rojnameyê Tarafî verîya nika zî amebi weşînayîş ke AKP ya xorî semedê ke MHPe yî parçe bikero no Ocaxê Osmanî awan kerdo û goreyê na plana AKPe hemverê Ocaxê Ulkicîyan, Ocaxê Osmanîyan 81 şaristanî de do bêro awankerdiş. Nêy Ocaxê Osmanîyan badê xeylê çalakîyan de cayê xo girewt.
Cînayeta Dînk
Derheqê Ocaxê Osmanîyan de yeno zanayîşke 2009’î de ameyo awankerdiş û serektîya ci zî keso bi nameyê Kadîr Canpolat keno û nêy îdarekarê ocaxan bi asanî Erdoganî ra bigî heta heme îdarekarê dewletî rey eşkenî pêvînayîş bikerî. Rayna nameyê nêy îdarekaran zaf çalakîyê tarî de vîyareno. Hetta nameyê Kadîr Canpolatî cînayetê Dînk û Papayê 16’in de zî vîyareno. Yeno zanayîş ke yew ereba meqamî ya no serekê ocaxî esta. Rayna endamê no ocaxî çalakîyan de diruşma ‘Ma lejkerê Tayyîbî’ zaf erzenî.
NAVENDA XEBERAN