Înîsîyatîfê Rojnamegeranê Azadan (OGÎ) bi îzehetêko nuştekî raporê îxlalê heqan aşkere kerd. OGÎye raporê xo Salona Konferansî ya Vedat Aydinî de aşkere kerde.
Rapor hetê Verfekê OGÎye Hakki Boltanî ra ame wendiş. Boltanî hem bi kurdî û hem zî tirkî rapor wend. Boltanî va ‘ma serrgêra hêrişê bombeyinî ke vera rojnameyê Ozgur Ulke de bîbî, pey xo de verda’ û wina dewam kerd: “23 serrî verê hêzê tarîyî bombe eştî rojnameyê Ozgur Ulke. Rojnameger Ersîn Yildiz merd. O wext seba ke rojname biqedênî, hêrişêko winasî kerdî. Labelê nêqedîya, her ke şî destekî hîna zêdîyayî û o kultur ewro hîna zî dewam keno.”
Boltanî bale ant ser hêrişê ke ewro benî ser û wina dewam kerd: “Ewro zî hêrişî dewam kenî û dewlete ewro zî hewl dana eynî amancî pê bîyara. Hetta hêrişî her ke şono zêde benî. No hukmat her roje hîna zaf çapemenîye keno hedef û hêriş keno. Nê hêrişan de çapemenîye raştê hêrişan yena, wesayîtî yenî şikitiş, dest ronîyeno kel-melan ser de, tepişîyenî û heqê înan de dozî abîyênê û erzîyenî zîndanan.”
Raporo ke hetê OGÎye ra ame aşkerekerdiş, wina yo: “Pêro pîya 168 rojnamegerî tewqîfbîyaye yî. 7 rojnamegerî ameyî tepiştiş, 4 rojnamegerî tehlîye bîyî, derheqê 28 rojnamegerî û 1 ajansî de doze abîye, 31 rojnamegerî ameyî mehkemekerdiş, weşanê 17 televîzyonan RTUK ra ame vetiş û heqê înan yê weşanî ame betalkerdiş, 4 serrî 9 aşmî ceza dîyaye 3 rojnamegeran, 3 rojnamegeranê bînan rê zî 106 hezar TL cezaya pereyî dîyaye, 1 rojnameger raştê hêrişo kardîyin ame, eştî kanalê televîzyonêk ser de, 1 rojnameger ame kiştiş.”
Boltanî tewr peynî keyeyê rojnameger Rana El Uceylî ke hêrişê DAIŞî ver merd rê zî serweşî waşt û wina va: “Heta ke rojnamegerî azade nêbî, Tirkîya krîzan ra rizgar nêbena.”
MA/AMED