Weçînayîşê 7ê hezîrane ra dima Tirkîya de polîtîkayê şer û rijnayîşî dîyayî destpêkerdiş. Bitaybetî teşebusê derbe ra dima bi îlankerdişê OHALî nê polîtîkayî vejîyayî duştê tewr berz û nêyî ra girêdaye îxlalê heqan zî zêde bîyo. Mîyanê nê îxlalan de îxlalê heqê domanan xeylê zêde yo.
Babete ser o Endamê Komîsyonê Domanan yê ÎHDyî yê Şûbeya Amedî Avûkat Ercan Yilmazî qisey kerd.
Bi seyan hedîseyê îstîsmarî
Yilmazî qiseykerdişê xo de va ‘raporê ke hetê ma û hetê rêxistinanê sîvîlan ameyo amadekerdiş de yeno dîyayîş ke prosesê pêrodayîşin de îxlalê heqan xeylê zêde bîyo’ û wina domna: “Bitaybetî bi qedexeyê tebervejîyayîşî ke ameyî îlankerdiş, hetê cuye, weşî, perwerde û sewbîna hetan de heqî ameyî îxlalkerdiş. No proses de bi seyan hedîseyê îstîsmarî ameyî cuyayîş. Dîmenê ke Sûr de vejîyayî orte de zî ame dîyayîş ke domanê ke bi keyeyanê xo Sûr ra vejîyayêne senî raştê îstîsmarî ameyêne.”
Hewl danî padî
Yilmazî dewamê qiseykerdişê xo de va ‘derheqê dozê îxlalê heqê domanan de prosesê mehkeme bi zanayîş bi hawayo giran yeno meşnayîş’ û wina dewam kerd: “Nêyî ver êdî keyeyî nêeşkenî dozan taqîp bikerî. Seba ke her roniştişê mehkeme de keye û kesê ke îstîsmar kenî yenî têrî, tayê keyeyî wazenî ke wa doze bêro padayîş. Mesele dosyaya Helîn Şene ser ro her çiqas ke 17 aşmî derbaz bîyî zî hema zî tehqîqat nêdîyayo destpêkerdiş. Reyna dozê domanê ke Sûr ra vejîyayî de zî eynî çî esto. Her çiqas ti delîl destê înan de çin o zî 10 aşmî yo ke nê domanî tewqîfkerde yî. Dergbîyayîşê mehkeme beno sebebê probleman.”
MELEK YUKSEL / ANF / AMED