Rewşa îstîsnayî (OHAL) ya ke 19ê çele de demê ci qedîyayêne, hetê hukmatê AKPyî ra reya dîyine seba 3 aşman ame dergkerdiş. Bi no hawa OHAL do heta 19ê nîsane bidomîyo.
Endamê Meclîsê Seba Demokrasî Yewîye (DÎB) ke vera OHALî de kampanyaya ‘derg meke’ dabî destpêkerdiş, derheqê dergkerdişê demê OHALî de reaksîyonê xo nîşan dayî.
Endama DÎBî Bînnaz Toprake va ‘OHAL û Qerarnameyê Hukmê Qanûnîyî (KHK)ti problemî rê nêbenî çareserî’ û qiseykerdişê xo wina domnaye: “Ewro rewşa Tirkîya xeylê xirabin a. Qewimîyayîşo peyên yê Stenbolî ra dima bitaybetî vatişê nefretî ke Twîtter ser ro yenî parekerdiş zî nîşan danî, mîyanê şarî de cîyabîyayîş vejîyayo duştê tewr berz. Ganî sîyasetmedarî bêrî têhet û seba rizgarbîyayîşê na rewşe, qerar bidî. Çimkî cîyabîyayîş ma ver bi felaketî kirêşeno.”
Ma dê kampanya bidomnî
Sereka Pêroyî ya EMEPî Selma Gurkane va ‘ma îlankerdişê OHALî ra nata waran de xebatê melumatdayîşî kenî’ û wina dewam kerde: “Wexto ke merdim nê 6 aşman ra ewnîyeno, vîneno ke çi seba hêrişanê terorî û çi zî awankerdişê ewleyîye de ti rol û mîsyonê OHALî çin o. AKP OHALî tena seba ke îqtîdarê xo bigiro bin temînatî, xebetneno. Ma do seba wedarnayîşê OHALî kampanyayanê xo bidomnî.”
OHAL vernîya qirkerdişan akeno
Serekê Pêroyî yê Partîya Şorişgerî Ufuk Golluyî zî va ‘welat bi OHAL û KHKyan yeno îdarekerdiş’ û wina va: “Hêrişê ke vera kedkar, karker û bindestan yenî kerdiş, wextê OHALî de vejîyayî duştêko tewr berz. Nê hêrişî zafane rêxistinîya nê hetan hedef gênî. AKP wazeno rayîrê Serekîye de ‘bexçeyêko bêtelû’ awan bikero. Berpirsîyarê qirkerdişo peyên zî îqtîdaro sîyasî yo. Çimkî polîtîkayê şaş yê Sûrîye nika agêrenî û zirar danî ma. OHAL seba çeteyanê selefîyan çin o, çeteyî bi her hawayî sebest hereket kenî. Ganî hêzê kede, demokrasî û azadî vera OHALî de têkoşînê xo gird bikerî.”
Wazenî ma dûrî bikerî
Sereka Pêroyî ya ESPyî Çîçek Otluye zî va ‘bi dergkerdişê OHALî wazenî muxalîfê ke vanê ‘dîktatorî rê nê’ asteng bikerî û wina dewam kerde: “Îzehetê çapemenî qedexe yo. Yê ke vernîya Reîna de îzehet dayî çapemenîye, hetê hukmatî ra ameyî tepiştiş, ma wextêko winasî de cuyenî. AKP hêrişê tarzê cuyayîşî ke qebul nêkeno, keno. Reyna AKP wazeno HDP referandum de ca nêgiro. Waştişê AKPyî no yo ke bi dergkerdişê OHALî ma taxan ra dûrî bikero, la ma do dûrî nêkewî.”
DÎHABER / STENBOL