Operasyono lejkerî ke Licê de ame destpa kerdiş rameno. Roja verî netîceyê pirodayîşan de 1 lejker kişîya, 3ê ci zî bî dirbetin. Bi desan wesayîtê lejkerî sewqê herêm bî. Wezîrê Karê Zerrî yê Tirk Suleyman Soylû şewa verî şi Licê.
Dewanê qezaya Amed Licê de, 5ê Adare ra tepya qedexe ame îlankerdiş û qedexe ra dima zî operasyonê lejkerî dest pa kerd. 18 dewê Licê bi rojano bin ablûqeya lejkerî deyê. Operasyono ke bi hezaran lejker, polîs û qoricî tewr benê de, bi sewqîyetanê newî ame hera kerdiş. Çarçoveyê operasyonî de 100 wesayîtê bi tîpê kîrpî û kobra sewqê mintiqe bî.
Wezîrê Karê Zerrî şi Licê
Çarçoveyê operasyonî de ca ca pêrodayîşî qewimyenê. Goreyê zonayîşan pêrodayîşan de 1 çawişê pispor merd, 3ê ci zî bî dirbetin. Herzewbîn vajîyeno ke, beno ke hûmara merdiş û dirbetinan berz bibo.
Heto bîn ra, Wezîrê Karê Zerrî yê Tirk Suleyman Soylû bi Fermandarê Pêroyî yê Cendirmeyan Orgeneral Yaşar Guler û Mudirê Asayîşî Selamî Altinok ra pîya şewa verî şi cayê operasyonî û lejkeran ra pêdîya. Soylu bado ke derheqê operasyonî de zonayîşan girewt.
AMED