Fatma ADİR
Erdoganî warê mîtînge ra îlan kerd ke ê do yew sere ra bikewî Qendîl û heta sereyê bînî yê Qendîlî şêrî. Cayo ke tira Qendîl yeno vatiş, Başûrê Kurdistanî de Zagrosan ra dest pêkeno û heta Kurdistanê Îranî, tayê rêzekoy î. Dîyar o ke Erdogan na cografya baş nêzano. Beno ke zanayîşê cografya yê Erdoganî qîmê nêyî nêkeno. Beno ke tam ferqê ci de nîyo ke leşkeranê xo do bierşawo cografyayêka senîne. Tîya de çîyo raşt no yo ke Erdogan seba dewamê îqtîdarê xo leşkeranê xo erşaweno cografyaya ke nêzano. Ê zî baş zanî ke cayo ke leşkerê tirkî wazenî bikewî mîyan, seba şerê gerîlatîye cayêko zaf baş o. Her yew sereyê koyê Qendîlî, reseno hetêko bîn. Ma qala koy û cografyaya ke heta sînoranê Îraq, Îran û Tirkîya şonî, kenî.
Ê nêşênî stratejîyê xo yê leşkerî goreyê ke plan kerdî na cografya de bierzî dewre. Şansêkê înan yê winasî çin o. Çîyo ke yeno famkerdiş, zanayîşê îttîfaqê faşîstî yê Erdogan û Bahçelîyî seba famkerdişê nêyî qîm nêkeno. Ê do stratejîyê xo yê Vakurê Kurdistan û Efrînî Qendîl de zî biceribnî. Labelê şansê serkewtişî yê nê tarz û taktîkî çin o. Xora hetê leşkerîye de mumkin zî nêaseno. Her çîyî ra ver tarzê têkoşînî yê gerîla de cayêk de vindetiş û ewja tepiştiş çin o. Gerîla yeno manaya hem heme ca de yo û hem zî ti ca de nîyo. Gerîla cayo ke bido piro de nêvindeno û ewja de meterîs nêroneno. Tarzê gerîla de bikarardişê erazî de tarz û taktîkê ‘bide piro û bireme, şo cayêko bîn de reyna bide piro’ esto. Nêyî yenî zanayîş.
Wexto ke ma na çarçewa de biewnî tira, îxtîmalo sifteyîn o yo ke Erdogan do bi hetkarîya teknîkî, bombekerdişî ra dima leşkeran birono. Gelo no mumkin o? Qet mumkin nêaseno. Labelê hema ma vajî rona. Gelo leşkerê ke bêrî ronayîş, aye cografya şinasnenî? Nê. Gelo ê leşkerî zanî do kura de û çi reyde têrî bimanî? Nêzanî. Ma vajî bombekerdişî ra dima leşkerî ronayî. O wext eke dormeyê leşkeran bêro girewtiş û hêrişê leşkeran bêro kerdiş, se beno? Eke hetê teknîkî de îmkanê mudaxalekerdişî çinêbo do se bibo? Beno ke ê bi hêrişê xo yê teknîkî bibo sebeb ke heme leşkerê ci îmha bibî. No zî mumkin o. Çimkî rewşêka winasî heme çîyî rê akerde ya. Eke wina bikero zî, qeybê gerîlayan goreyê leşkeran do zaf tay bo. O wext beno ke aqûbetê heme leşkerê ke dima ra bîyarî warê şerî zî eynî bibo. Operasyonêko winasî do bibo sebebê qeybê moralî û binkewtişî.
Gelo şansê ci yê bejrayîrî ra bêro, esto? No zî îxtîmalêko zeyîf o. Ma eşkenî ser nê îxtîmalî de zî bivinderî. O wext zî îxtîmal esto ke şarê Raperînî vera dagîrkerîye de dest bi xoverdayîşêko topyekun bikero. Yeno zanayîş, vera dîktatorîya Sedamî de şarê Raperînî sere wedarnabi. Xora nameyê Raperînî (serewedaritoxî) zî tîya ra yeno. Ma qala waro ke heta nika bi bedelanê girdan xover dayo û xoverdayîşê xo demêko derg domnayo, kenî. Çimkî Qendîlo ke Erdogan vano ez do operasyon biviraza, hîrêgoşe de yo. Her goşeyî de kurdî cuyenî û nê kurdî zî bi welatperwerîya xo yenî şinasnayîş. Yanî rewşa ke aleyhê dagîrkeran de ya, esta. Vîrê şaranê Rojhelatê Mîyanênî de xeyalê Osmanîyan ganî yî. Xora Erdogan zî nê waştişê xo hertim ano ziwan. Şarî zî do vera nêyî de bivinderî.
Beno ke îttîfaqê faşîstî yê Erdogan û Bahçelîyî bawerîya xo bi hemkarîya tayê hêzan ardî. Partî, dezge û şexsîyetê ke destek bidî operasyonê dewleta tirkî, nêşênî Kurdistan de sîyaset bikerî. Yê ke vera şarî de hetê dagîrkerîye de bivinderî, do vînî bikerî. Sere de şarê Raperînî, kurdê çar parçeyanê Kurdistanî û hêzê demokrasî do vera nînan de bivinderî. No do vera doza azadîye yê şarê kurdî de sey îxanetî bêro dîyayîş û do qet nêro qebulkerdiş. Cok ra heqê nînan yê cuyayîşî daxî nêmaneno.
Netîce de operasyono ke vera Qendîlî de bêro viraştiş, herinda dewamê îqtîdarê Erdoganî de do peynîya ci bîyaro. Her merg do vera Erdoganî de bibo antîpropoganda. Şîroveyê sey ‘seba îqtîdar û menfîetê xo leşkeran feda keno’ bêrî kerdiş. No zî do peynîya Erdoganî bilezno. Nika rewşêka winasî esta.