Cayê gureyê to nêzdîyê keyeyê to yo. Ti ge-ge zî paya keye ra şinê gure. Eyro zî ti nêniştî wesayîtêk. Xora hewa zî pakî ya. Tîje esta la germin nîya. Payîz o. Darî hêdî-hêdî pelanê xo kenê war. Ti peyanê daran ê zerdan temaşe kenî. Na manzara zaf weşê to şina. Ti ferq kenî ke ti erey manenî gure. Ti fek temaşekerdişê pelanê zerdan ra veradanî.
Ti leze lez verê xo danî cayê karî. Şima areyîya xo kenê. O zî vera to de ronişte yo. sey her roje teber ra tost waşto. Ey ra verî şima areyî de tost nêwerdênê. Edetêko newe ardo cayê karê şima. Nê rojan de şima hema veje her roj tost wenê. Şima areyîya xo qedînenê. Ti semedê antişê cixare vejîyenê teber. O zî to tima yeno. O zî yeno verê to de nuşeno ro.
Ti tutinê xo yo newe vejenî. Tebeqeya to zî newe ya. Tebeqeya to bereqyena. Ti yew tutin pêşenî. O zî to rê yew tutin wazeno. Ti her tim wazenê çîyêk îkramê hevalê xo bikerî. Semedo ke to rê tutin wazeno keyfê to yeno. Ti vanî ‘Ez to rê bipêşî.’ Qebûl keno. Ti yewêk pêşenî û dergê ci kenê. Yew di nefes dano piro. Huyeno. Vano ‘Hêval tutinê to zaf tuj û xidar o. Dewqa mi şî.’ Şima pîya huyenê. Huyayîşê ey sey huyayîşê gedeyan o.
3 aşmî ke şima yewbînan şinasnayo. Şima her di zî mîyanê nê 3 aşman de bîyê hevalê yewbînan. Solê ey kewenê çimanê to. Solêkê sipî yê. Huyayîşê to solanê ey ra yeno. Ferq keno ke ti pê solanê ey huyenî. Ti vanî ‘solê to xeyrîn bê’. Spas keno. Vano ‘solê mi qasê solanê to nîyê la unca zî weş ê’ ti vanî ‘weş ê weş.’ Şima cixareyanê xo şimenê û radanê şinê cayê karî.
To gore rojêka weş a. Ti unca eyro zî huyayî. Saete bena 12:00. Xebera ey yena şima. Vanê ‘Xelîl qezaya trafîkî vîyarnaya û weradîyayo nêweşxane.’ Kêfweşîya to heta a saete ya. Hinî xemgînîyêka girane dorê to pêçena. Huyayîşê ey yeno to vîr. 2 saete badê cu zî xebera mergê ey resena to. Hîşa to şina. Aqilê to sereyê to ra şino. Ti benê xînt.
Pitîya to nêvejîyena. Ti benî sey robotêk. Ti şinî nêweşxane. Vanê ‘Xelîl morg de yo’ ti cesaret nêkenê şêrî ey bivînî. Bermayîş pere nêkeno. Huyayîşê ey o esmer yeno to vîr. Nika o rîyo pak û delal merde yo. Nêhuyeno… Ti xo bi xo vanî ‘werekna mi o nêşinasnayêne’ La to şinasna û o vinî kerd. Ti zaf hêrsin î. Ti îsyan kenî.
Ti vanî ‘Çi ra însanê başî na dinya leze caverdenê.’ Însanê xirab yenê to vîr. Ti însanê xirab û başan danî têver. Ti ferq kenê kenî ke însanê xirab însanê başan ra zêde yê. Wa îna bo Xelîl. Wa sey to bo. To zî ma caverda û şî. Ti merdimê dewayêk bî. To heyatê xo semedê şarê xo vîyarna. Ti merdimêko welatperwer bî. Malê to çîn bi. Tenya fikr û mucadeleyê to estbi. To yew çî musna ma. O zî heskerdişê welatê xo û mucadele bi. Mîrasêko ercîyaye no yo xora. Wa cayê to cennet bo hevalo ercîyaye..
Enver YILMAZ