Tespîtê xesarî hona nêbi
Qeza ya Çewlig Gêxî de 3ê aşma Kanûne de bi qûwetê 5.5 erdlerziya-şaniya. Badê no erdlerzinî, qeza de bi desan erdlerzinê bînî bî. 3ê aşmî ra na het bi seyan zelzeleyê qijkekî-werdî qewimiyay. Ronişteyê qeza yê ke rîwalê tersê deprem-zelzele nêeşkenê şirê keyeyê xo mexdûr biyê.
Gêxî ra piya, zelzeleyan Azarpêrt, Çêrme û Xolxol de zî tesîr kerd. Xêlê cayan de hona gureyê tespîtkerdinê xesarî nêame ramiten. Nayî ra welatijî dewlet rê nêrazîbiyen damûsnenê. Cayê ke tespîtê xesarî amey kerdin rê zî, hona konteynirî nêeşrawiyayî.
Xolxol de xesarê giran
Merkezhe Xolxol de 20, dewa Mûrûn de 10, Seter de 1, Çikan de 13, Aftariç de 8, Gunluk de 2, Kalkanli de 7, Şêxan û Zênan de 56 keyeyan xesarê giran dî. Enê dewan de, xêlyek keyeyî rijiyayî. La hona yew konteynir zî nêame dayen.
Qezaya bîn Azarpêrt de tenya 15 dewan de gureyê tespîtê xesarî ame ramiten. La bi desan dewanê bînî de, rexmo ke dewijan waştenname da qeymeqamtî, gureyînê tespîtkerdinê xesarî nîame ramiten. Dewijan nêşirawitê ekîbê gureyîn û konteyniran rê nêrazîbiyen damûsnay.
Dewijan ra Esat Akengîn persa 'Ma yew sûc kerd, haya ma çinya'? kerd û nêşirawitişê yardimî rê nêrazîbiyen damûsna.
Parlamenterê HDP şi Gêxî
Kişta bîn ra parlamenterê HDP Hişyar Ozsoy, bi yew heyetî ra piya şi Gêxî. Ozsoy verikîn derheqê zelzele de, bi qeymeqamê qeza ra pêdiya. Pêdiyayin de, qeymeqamê Gêxî Mehmet Ayhan'î îdia kerd ke, pêrokîn dewanê zelzele de gureyê tespîtkerdişê xesarî dayê destcikerdin.
Hewcedariyê konteyniran esto
Parlamenter Ozsoy badê pêdiyayin şi ziyaretê welatijan û xesarî ca de taqîp kerd, goş da vatişanê mexdûran. Welatijan hewcedariyê konteyniran resnay Ozsoy. Herzewbîn aşkere kerdî ke rexmo ke keyeyê xelyêk welatijan bi temamî rijiyayo, îynan rê konteynir nêame tehsîs kerdin.
Hişyar Ozsoy'î hayr ant xesarê gird yê dewa Zênan ê Xolxolî ser û hewcedariyê lezîn yê konteyniran ard ziwan.
NAVENDÊ XEBERAN