Konservatuarê Şaristanî yê Aram Tîgranî o ke Serekîya Daîreya Kultur û Turîzmî ser xebatan keno tax û dewan de dest bi xebata kulturî kerd. Aktîvîteya “Palyaço” û “Kitabo Zindî” 3’ê tebaxe de dest pê kena û heta 9’ê tebaxe dewam kena. Çarçiwaya programî de do semedê gedeyan kaya “Palyaço” û “Kitabo Zindî” bêrê pêşkêşkerdiş. Xaye no yo ke wa gedeyî bihuyî û demêko weş bivîyarnî.
Na aktîvîte hetê Palyaçoyê Sînornênasan ra do bêro îdarekerdiş. Eyro Konservaturê Şaristan yê Aram Tîgranî de xebata atolye, wendişê Kitaban û nîşandayîşê kaya palyaçoyî dest pê kerd. Na aktîvîte do siba Wendegehê Hunerî yê Qelêşa Erxenî, 5’ê tebaxe de Wendegehê Avdelaya Pîranî û Nêrîba Hêne, 6’ê tebaxe de Kampê Gedeyan yê Hamnanî, 7’ê tebaxe de kampê Fîdanlixî, 8’ê tebaxe de Batman de Kampê Şengalî û 9’ê tebaxe de zî Wendegehê Cixsaya Pasûrî de do bêro viraştiş.
Palyaçoyê Sînornênas 18 cayanê dinya de xebatan kenîy. Koordînatorê Palyaçoyê Sînornênas Gural Dinçol derheqê xebatan de qalî kerd û vat: “21 hunermendî hewteyêk o xebetyenê. Ma nika na xebate ard Amed. Ma bi hetkarîya Konservatuarê Aram Tîgran yê Şaredariya Şaristano Gird a Amedî kampa Şengalijan û Wendegehanê Hunerî de xebat kenîy. Ma Amed de hunermendan dir xebatêka atolye kenîy. Ma Stenbol de hefteyêk xebetyayê” Dinçol da zanayîş ke na qonaxa ewil a û vat: “Ma wazenîy demêko hîra de xebat bikîy. Palyaçoyê Sînornênas 18 cayanê dinya de xebate kenê û 33 welatî ke çîyê sey afat, travma û şer tede estê de xebate kenê.”
AMED