Îlanê xorayverînê sifteyîn Nisêbîn ra 

Serva xopawiten zî, xeylê cayanê Bakur de, xendekî kinitiyayî û barîqatî roniyayî. Quwetanê tirk serva-qandê îradeyê şarî bişikînê, heme hetan ra êriş kerd. Êrişê sifteyin Silopî de destpa kerd û jewê ci qeçek-doman 3 kesî kişiyayî. 27ê tîrmeh de zî Nisêbîn de Abdulkadîr Asan û Seyîdxan Dede kişiyayî. Ser nayî  Meclîsê Şar yê Nisêbîn 9ê tebaxî de gama sifteyin eşt û xorayverîn îlan kerd. Pey ra zî mintiqeyê Botan, ya ke rewna ra hadreyinî kerd, 10ê tebaxî de Şirnex, Hezex, Cizîr û Silopî de, rayverînê xoser îlan bî.13ê tebaxî de zî Meclîsanê Şarî yê qezayanê Mûş Gimgim û Kop xorayverînî îlan kerd. 14ê tebaxî de zî qezayanê Wan Artemêtan û Îpekyolu eynî qerar eşkere kerd. Eynî roj Colemerg de zî Meclîsa Şarî xorayverîn îlan kerd.


Polîtîkayê ‘qedexe’ yê vetişê kuçe

Sûka Egîd û Delîlayan Farqîn de, vera dewleta tirk xorayverînî 15ê tebaxî de îlan bî. 18ê tebaxî de Licê û Bazîd, 19ê tebaxî de mehle-taxa Gazî yê Estenbolî, qezayê Bedlîs Xêzan û xeylê cayanê bînan ê Bakurê Kurdistanî, jew bi jew rayverînê xoyê xoser îlan kerdî.

Dewleta tirk û hikumeta AKP, vera na waştena şarê kurd, 15ê tebaxî de Gimgim ra dest bi êrişan kerd. Quwetanê tirk serva-qandê bikewê mehleyan, 3 rojan êriş kerd, la belê şarî xo pawit û nêvirada, destûr nêda çeteyê AKP bikewê taxanê ci. Êrişanê çeteyanê AKP ser, cayê ke xorayverînî îlan biyê, bi rayverînê YDG-H de, xopawitin vistiya dewre. 18ê tebaxî de waliyê tirk ê Amed’î Farqîn de qedexeyê vejiyayinê kûçeyan îlan kerd û çeteyanê AKP zî êriş kerd û 3 welatijî kiştî. Xoverdayişê şar û gencan ser, quwetê tirk peyser anciyayî. Quwetanê tirk badê Farqîn’î 22ê tebaxî de êrişê Sûr kerd. 24ê tebaxî de ancî-reyna Farqîn de qedexe ame îlan kerdin û raştê xoverdayişê girdî amê. 


Bi desan welatijî kişiyay

27ê tebaxî de verra Cizîra Botan zî êriş viraziya. Quwetanê tirk 2ê ci qeçekî, 4 welatijî kiştî. Eynî roj Şirnex de zî jew qeçekê 16 serre kişiyayî. 27ê tebaxî de zî qezayê Colemerg Gever de 4 welatijê sivîlî kişiyayî. AKP 4ê îlon de Cizîra Botan de qedexe îlan kerd, la belê rastê xoverdayişê girdî yê şarî amê. Peyniyê xoverdayişê tarixî de qedexe badê 9 rojan, 12ê îlon de hewadiya. Çeteyanê AKP qedexe yê 9 rojîn de, mihemedê 35 rojî ra piya, 21 welatijî kiştî. Cenazeyê welatijan zî, bi jû merasîmê da heybetîn defin bî. Rojê tepiya ancî qedexe îlan bi, la belê xoverdayişê şarî ser, badê jew rojî hewadiya. Peyniyê êrişanê dewleta tirk ê Farqîn, Nisêbîn, Bismîl, Kerboran, Hezex, Dêrîk, Şirnex, Gever û Sur de, bi desan welatijî kişiyay û bi desan kesî bî dirbetinî. La belê dewlet se kerd nêşa, şaranê nê cayan teslîm bigîro. Çeteyanê tirk 27 û 28ê îlon de Bismîl de Elîf Şîmşek a 8 serrîn, Halîl Kurtîş û Egîd Yildiz kiştî.29’ê îlon de jî polîsanê AKP qeçekê bi nameyê Beraat Guzel kişt. Çeteyanê AKP 6ê cotmeh de zî Colemerg de 4 gencî kiştî û cenazê înan zî lete kerdî. Mabenê 6 û 13ê cotmeh de zî quwetanê tirk qezayê Amed Sûr de qedexe îlan kerd, la rixmê êrişanê leymin-qilêrîn nêşa bikewê mehleyan. 


Cenazeyê Bîrlîk erd ra kaş kerdî

Çeteyanê AKP şewa 2ê cotmeh de verra tax-mehleyê xoser ê Şirnex êriş viraşt û Hecî Loqman Bîrlîk kişt. Quwetanê tirk cenazeyê Hecî Loqman Bîrlîk kindira peyê erebe girêda û bi seyan metre erd ra kaş kerd. Çeteyanê AKP dîmenê kaşkerdinê Bîrlîk ser medya ya sosyal de weşînay. Ê dîmenî bî sebebê hêrs û nêrazîbiyenanê girdî. Dewleta tirk 1ê cotmeh de fina da bîn Nisêbîn de qedexe îlan kerd û wextê qedexeyê hetanî 6ê meng de, Lokman Sune û 2 welatijê bînî kiştî.13ê Mijdar’î de Nisêbîn de xoverdayişê bîn ê wext dergî dest kerd ci. Qedexeyî hetanî 26ê Mijdar dewam kerd û quwetanê tirk 7 kesî kiştî.


Êrişê bi helîkopterî 

Dewleta tirk Nisêbîn de, 29ê Mijdar’î de ancî-reyna qedexe îlan kerd û no qedexe hetanî 9ê Kanûne dewam kerd. Wextê enê qedexey de zî jewê ci qeçek-doman 5 welatijî kiştî. Şarê Nisêbîn bi jew merasimê  pîl şehîdê xo defin kerdî. Dewlet qezayê Amed Farqîn’î de, 2ê Cotmeh de, qedexe yê 4. îlan kerd û 4 kesî kiştî.18ê Cotmeh de zî, reyna-qora 5în qedexe îlan kerd û xoverdayişê şarî ser 21ê aşmî de hewada. 4ê Mijdar’î de Farqîn de qora 6. qedexe îlan bi û hetanî 14ê aşm ramit. Dewleta tirk bi tanq û topan êriş kerd, la belê Farqîn’î xo ver da. Ê rojan ra tepiya zî, Sûr, Nisêbîn, Farqîn, Gever, Bismîl, Kerboran, Hezex, Dêrik û Şirnex û xeylê cayanê bînan, hetê ra qedexe îlan kerd û hetê ra bi tifînganê giran, wesaîtê zirxîn û tanqana êriş kerd.

Dewlet cayê ke girot ablûqe ya eskerîn, herzewbîn hewa ra zî bombevaran kerd. Dewlet kişta wesayîtanê zirxî ra piya, helîkopteran vist dewre û hewa ra bombevaran kerd. La belê şarê kurd heme cayan vera êrişan û wahşetê dewleta tirk xo ver da, rayverînê xo yê xoser pawitî û serra 2015 açarnê zey serra xoverdayiş û xopawitenê xoserîn.  


NAVENDÊ XEBERAN