Bado ke 1 polîsê tîmê taybet operasyon de merd ra dima, polîs û leşkeran 6ê Tebaxe de eştî dewa Şapatan ke girêdayê qezaya Şemzînana Colemêrg a ser û welatijan rê îşkence kerdî. Badê îşkence 36 dewijî ameybi tepiştiş û dima ra serbest veradîyaybî. Derheqê bîyayîş de rastîyê neweyî vejyenê orte. Necmettîn Korkmaz o ke bi cinî û keynaya xo ya 6 serrî ra raştê îşkence amey, dîhaberî rê qisey kerdî û qalê îşkence kerd. Goreyê vatişanê Korkmazî quwetanê dewlet destê ey bi panzerî ra girêday û heta 500 metre erdî ra kaşkerdî.


‘Ma dê ruhê şima bigîrê’

Necmettîn Korkmazo ke şopê îşkence ser ganê ci de estê vist vîrî ke bi şew saet 01.00 de camê înan amey şikitiş û wina behsê sereştişî kerd: “Ez ver bi kêberî vazdaya la nêresaya. Kêberî zî bi paşkule şikitî. 4-5 kesan ez dorpêç kerda, çek nay sereyê min ro û bi qûndaxê çekan day mi ro. Bi paşkule û kulmike day paştî û sereyê min ro. Vatî ‘Gişta şima kiştişê tîmê taybet de esta. Do gonîya şehîdê ma erdî de nêmano. Heta ke ma tîya de bê ma dê rehetî nêdê şima. Senî ke ma tîya de can da, ma dê can bigîrê.’ Dima ra ez veta teber û mi vengê bermayîşê cinîya xo hesna. 

Bi kolîyanê ma ke ver kêberî de bî day min ro. Bi çeke (tifing) mi tehdît kerdî û vatî ‘ma dê to bikişê.’ Day min, cinîya mi û keynaya min ro.” 


Bi panzerî ra girêday û kaşkerdî

Korkmazî vist vîrî ke îşkenceyî rayîrî de zî dewam kerdo û wina va: “Destê mi bi panzerî ra girêday û heta keyeyê muxtarî serpaştî erdî ra kaşkerdî. Nezdîyê 500 metr mi erdî ra kaşkerdî. Qedexe bi ke ez werza ser payan. Her reyî ke ez werzaya ser payan bi paşkule day min ro. Qiseykerdiş, vengdayîş û qîrayîş qedexe bi.” Korkmazî dîyar kerd ke pêro ronişteyê dewe zey ey raştê îşkence amey.

Necmettîn Korkmazî dazanayîş ke bi wesayîtêka spî ey berdî mudirîyetê polîsan û va, “Rayîrî de heqaret û îşkence dewam kerd. Ver emnîyetî de yê ke paweyê ma bî amade bî. Ma ra vatî, ’Tiya ra xelesyayîşê reyayîşê şima çin o.’ Bi dore day herkesî ro.”


‘Şima tay dayo înan ro’

Korkmazî dazanayîş ke rapora derpkerdişî nêdîyayo înan û wina dewam kerd: “Îşkence ra dima Dr. Elîf Ç rapor nêda ma. Doktorî wexto ke mi dî polîsan ra va, ‘Bêrê şima tayî dayo ey ro. Tayo bîn zî pirodê. Wa gonîya şehîdanê ma erdî de nêmano. Ma rapor nêdanê ti kesî.’ No 3 serrîyo ma bi  îşkenceyê winayin ra rî bi rî manenê.”


Pere û zerdî zî diznay

Cinîya Necmettîn Korkmazî Kudren Korkmazî zî behsê wehşeta polîsan kerd û vist vîrî ke destê aye girêday, aye derp kerdî, eştî erd û hetê 3 kesan amê pelixîyayene. Korkmaz dîyar kerd ke keye de tebayêk saxlem nêveraday û wina va: “Wextê sereştişî de ver çimanê mi de pere û zerdê mi zî amey tirawitiş. Pere û zerdê mi mîyanê yew sindoqe de bî. Sindoqe şikitî û pêro diznay. Seba Pere û zerdan ma serpirodayîşê dozgerî kerd.” Kudren Korkmaz herzewbîn ard ziwan ke çimê keynaya înan a 6 serrî girêdayê û eştê dayê dîwarî ro. Korkmaz dazanayîş ke iyê dê rojanê vernî de şirê serpirodayîşê dozgerî bikerê û gerreyê sucî bikerê.   


 DÎHABER/COLEMÊRG