Qezaya Sûrî ya Amedî de qedexeya tebervejîyayîşî ke 28ê Teşrîna peyêne de ameye îlankerdiş û 104 rojan dewam kerde ver xeylê kesî qeza de mehsur mendbîy. 2 grûbê ke 3 û 7ê adara 2016î de ameyî tehlîyekerdiş û derheqê 3ê ci doman 11 kesan de doze abîbî. Çendêk verê derheqê nê 11 kesan de 36 serrî cezaya zîndanî ameye dayîş.
Na rey hetê Mehkemeya Cezaya Girane ya Amedî ra qerarê sebebê cezadayîşî ameye aşkerekerdiş. Qerar pêro pîya 33 rîpelan ra pê yeno. Qerar de yeno vatiş ke domanan îfadeyê xo de vatî, ê şîyî Sûr û ewja de mehsur mendî, labelê sucan qebul nêkerdî. Goreyê qerarî cilanê domanan ser de madeyê Antîmon, HDX û RDX ameyo dîyayîş û nê madeyê ke sîleh û madeyê teqayîşî de estî yî. Her çiqas ke Mehkeme dîyar nêkerda ke nê madeyî senî cilanê domanan ginayî, reyna zî nê madeyan sey delîl nîşan daye.
Ceza daye ci
Reyna Mehkemeye îfadeyanê şahidan û pawitişo ke domanan bi ziwanê kurdî kerdbî ‘sey vindetişo negatîf’ nîşan daya û cezayê domanan de kêmî nêkerde. Bitaybet F.Yyo 16 serreyî ke Sûr ra bi hawayo birîndar ame vetiş rê 4 serrî 5 aşmî û 10 rojî ceza ameye dayîş. Her çiqas ke F.Yyî îfadeyê xo de dîyar kerdo ke o nêkewto pêrodayîşî û polîsan bombe eşto keyeyo ke o tede yo û bi no hawa birîndar bîyo, reyna zî Mehkemeye parçeya ke laşê F.Yyî ra ameye vetiş sey delîl girewte dest û ceza daye ci.”
AMED