Sewa ke hetê FEDA 18ê Kanûne virajiya, hometa alewî, dostê alewîyan, çormeyê soresger û demokratî ra nêzdîyê hezar kes tewrê sewê bi. Herzewbîn komel û dergahê alewîyan kî temsîlkarê xo rusnay sewê. Sewa vîrardena qetlîamê Mereş de, hayr anciya qetlîamê ke rojhelatê mîyanî de virajîne ser. Herzewbîn teror û ablûqeya ke hikûmata tirk Cîzîr, Sîlopî, Nisêbîn, Kerboran û Sûr de nayro protesto bi.
Kerbela ra heta Cizîr
Sewa ke hetê Dergaha Pîr Sûltan Abdal yê Parîs’î amê organîze kerdin, ebi Gulbanga Pîr Riza Yagmur’î destpa kerd. Riza ard zone ke, “Kerbela ra heta na het, qetlîamî ebi Dêrsim, Maras, Sewaz, Gezî û Roboskî, roca ewroyînî de kî ebi Sengal, Kobanê, Amed, Enqera, Cizîr, Nisêbîn dewam kenê.”
Pîr Riza Yagmur’î veng da hometê alewiyan û wast ke, leyê mazluman de cayê xo bigîrê, poşt bide xoverdayişê sarê kurd.
Sîyasetmedar û nuştox Fuat Kav’î zî vîrarden de qiseykerd û hayr ant têkiliya hometa alewî bi Hereketê Azadiyê Kurd ser. Parlamentera verên Çîlem Oz kî sew de qisey kerd û hayr ant demê weçîntayin de rolê ceniyanê alewiyan ser.
Kirmancan het de ca bigime
Parlamenterê HDP Muslum Dogan kî sewê de hadre bi. Dogan’î qiseyanê xo de vinderdisê xoverder yê hometê alewiyan ard vîrî û niya va: “Roca ewroyî de, qetlîamê ke Kurdistan de virajiyenê herkes vîneno. Dustê nê polîtîkayanê zorvajan sarê kurd xover danê. Dogan’î veng da hometê alewî û wast ke, serva demokratîkbiyena kurdistan û tirkiye xoverdayisê qomê kirmancan het de, cayê xo bigîrê.
Partiya Sosyalîst yê Fransa ra François Pupponî kî sew de qisey kerd û kistisê Sakîna Cansiz, Rojbîn û Leyla ard vîrî. Pupponî ard zon ke, kirmanchi verva DAİŞ danê piro, bi xoverdayişê tarixî Kobanê xelesnay. Pupponî aşkere kerd ke, neyra tepya kî çi destê îyna bîro, eyî bikerê û paşt bidê kirmancan. François Pupponî aşkere kerd ke, verra DAİŞ xoverdayişê kirmancan serva îynan kî muhîmo û xoverdayisê sarê kurd silamî kerd.
Seveknayisê xo bicirime
Hemserokê FEDA yê Awrupa û yê Fransa kî mesajê xo wendî. Mesajan de alewiyan ra waziya ke, seveknayisê xo, bi xo virazê. Herzewbîn hayr anciya ehemîyeta FEDA û projeyê alewîyanê ke nebîyê bindestê dewlet ser.Sew de, herzewbîn mesajê xeylê sazgeh û rêxistinan amey wendin. Badê qeseyan, hunermendan ra Hozan Comert, koma Pîya, koma Zazlaz, Hozan Alî Sîzer, Ozlem Baglayan, Mîkail Aslan, koma Abdal vecîyayî ser sehne.
ŞAHÎN POLAT/PARÎS