Fatma ADİR Şima wazenî vajê weçînayîşê verwext, panîk û zextkar, şima ci ra se vanî vajê, Erdoganî Tirkîya dekerdo prosesê weçînayîşî yo newe. No weçînayîş meşrû, demokratîke û adil nîyo û her tewir sextekarîye û hîle rê akerde yo. Xeylê polîtîkayê bêehlaqîye yenî domnayîş. Tîya de rewşa huqûqê dewleta TCyî ya antî demokratîke zî çin a. 16 serrê îqtîdarê Erodoganî de hertim îqtîdaro ke bêxera HDPyî ti partîye bi hawayo hêz îtîrazê ci nêkerdo, ameyo cuyayîş. Serekkomar Erdoganî kamcîn wext waşto, goreyê xo rojevêk awan kerda û domnaya. Partîyê bînî zî goreyê ci hereket kerdî û seke vera ci de têkoşîn bidî, têgêrayî. Îqtîdarê Erdoganî na rewşe ra zaf îstîfade kerdo. 16 serrî îqtîdar de mendişê Erdoganî de rolê nê partîyan zaf o. Erdogan heta nika heme şert û mercan bi destekê nê partîyan bica ardo. Sebebê na rewşe na ya ke heme partîyî yewbînan manenî. Nê partîyan ra tena HDP yê bînan nêmanena. Partîyê bînî heme sey ruhcêwîyê yewbînan î. Raştîya dewleta tirkî de seba partîyanê bînan hertim pawitişê dewlete bîyo çîyo esasî. Îqtîdar yan zî muxalefet, reyna partîyê ke xo sey çepgir û raştgir şinase kerdî; ferq nêkeno, na rewşe seba hemînan hertim wina bîya. Nê partîyan hertim ser vatişê ‘Dewlete, millet, Sakarya’ ra têgêrayî. Partîyê ke tewr zaf xo azadîwaştox û hetgirê şarî nîşan dayî de zî na rewşe nêbedilîyaya. Çimkî heme zî sey partîya dewlete vejîyayî. Wexto ke vatî şar daxî, goreyê menfîetê dewlete hereket kerdî û hertim hewl dayî şaro ke winasî xelq bikerî. No semed ra yo ke seba ti partîye azadî, demokrasî û seyyewbînanîye nêbîyî çîyê esasî. Cok ra qaydeyê bîyayîşê hukmatî, kamcîn partî partîya bîne ra çiqas zêde dewlete pawena û nîjadperest a, ya. Ganî merdim nakokîya nê partîyan sey ke mabênê înan de pêrodayîş bibo, nêvîno û nêkewo na şaşîye. Tîya de çîyo esasî bîyayîşê îqtîdarî yo. Mabênê înan de ferqê şenikî estî. Nînan ra yewe hewl dana keska dewlete, ya bîne sipîya dewlete, ya bîne zî hewl dana sîyaya dewlete bierzo dewre. Nê partîyê ke mîyanê înan de ferqê şenikî estî, zaf reyan rewşa tarî, lêmin û kûre ya faşîzmî de îttîfaqan virazenî. Çimkî ê partîyê dewlete yî. Tîya de ya ke yê bînan nêmanena û yê bînan ra cîya ya HDP ya. HDP dewlete seba xizmetê şaran, komelan, cinîyan û ciwanan sey haletî vînena. Dewlete seba xizmetê merdimîye haletêk a û sewbîna manaya ci çin a. Eke seba amancêkê haletêk ameyo awankerdiş, o wext ya muhîm zî o halet çiqas xizmetê ê amancî keno yo. Tîya de şar, komel û merdimî pêro pîya çiqas bi hawayo azade, seyyewbînan û adil cuyenî beno muhîm. Dewleta tirkî awanbîyayîşê xo ra nata qet goreyê mîsyonêko winasî nêbîyo wesayîtê haletî û rolêko winasî kay nêkerdo. Şima halet yan zî wasitaya dewlete ra vanî se vajê, seba xizmetî esta. No halet vîyarte, ruh û hîsê cografyaya ke tede awan bîyo ra miqate beno. Halet zî bo, eke goreyê xusûsîyetê erdê ke ser o awan bîyo hereket nêkero, nîno qebulkerdiş û zirar dano ê erdan. Ecizî virazîyena. Cok ra ganî halet goreyê xusûsîyetan bêro eyarkerdiş. HDP awanbîyayîşê xo ra nata seba ke wina bikero, bedilnayîşê dewlete esas gêno. Na dewleta ke qala aye yena kerdiş, ganî zirar, merg, qetlîyam, zulm nê, tam çepê înan de bibo haletêko ke feyde dano şarî. HDP wayîrê zîhnîyetêko winasî yo. Cok ra HDP vano ganî tesilî dewlete bêro bedilnayîş û têkoşînê nêyî dano. HDP seba ke partîyanê bînan ra cîyayêr o, vera polîtîkayanê hêriş, tewqîfkerdiş û qetlîyaman de bi hawayo serkewte vindeno. Cok ra hende rengin, ganî û zaf eleqe vîneno. HDP ameye, hîs, ruh û tarîxê nê erdan temsîl keno. Cinî, ciwan û heme bawerî û nîjadê ke yenî cîyakerdiş binê banê HDPyî de yenî têhet. Tena wa heme hetê eleqederî goreyê nê ruh û hîsan hereket bikerî, bes o. Do serbikewî…