Seba şaro ke hêrişan vera bi neçarî keyeyê xo ra vejîyayo qezayê Kayapinar, Yenîşehîr û Rezanî de çalakîyê paştîdayîşê yewbînan dom kenî û her ke şono nê kampanyaye hîna girdêr benî.

Şaredarîya Şaristanê Gird, Kayapinar, Rezan, Yenîşehîr, Komeleya Rojawanî, Komeleya Sarmaşik û Komeleya Koçî zî tede xeylê dezgeyê sîvîlî mîyanê koordînasyonî de ca gênî û lazimîya koçberan veynenî. Babete ser o Hemsereka Komeleya Paştîdayîşêyewbînan û Hetkarîdayîşê Rojawanî Zarîfe Ozbeklî qalî kerd.

Şenê serpirodayiş bikerê
Ozbeklî ciresna ke ê Amedî de koordînasyonê hetkarîdayîşî awan kerdo û wina verdewam kerd: “Ma koordînasyonêkî ke 5 şaredarî û partîyê sîyasî zî tede ca gênî awan kerd û ma lazimîya şarî tespît kenî û goreyê ci têgêrenî. Verê malbatê Şaredarîya Sûrî ra sere daynê piro la nika eşkenî sere bidî heme şaredarîyan ro. Malbatî ke sere danî piro keyenîşanê xo dîyar kenî. Ê ke sere nêdayî piro zî hetê cîrananê xo ra yenî tespîtkerdiş û ma rê zanayîş danî.
Hewcedariyê keye
Heta nika 2 hezar û 700 malbatî ra ma hetkarî resnayî la 4 hezar serepirodayîşî estî. Mîyanê lazimîyan de tewr zaf lazimîya keyeyî esto. Nika 3-4 malbatî yew keyeyî de manenî û no problemêko gird o. Mutahîtê ke banan virazenî eşkenî çend bananê xo bidî nê malbatan. Wayîrvejyayîş wezîfeyê ma yê sifteyîn o.”

Tenya Sûr de nê, heta nika bi des hezarî welatijî sûkanê Kurdistan ra amey goçkerdiş.  

JINHA/MED