Raportora Parlementoya Ewrupa ya Tirkiye Katî Pîrî raporê jû serrîn ê derheqê Tirkiye de kerdbi hedre. Roniştinê perey de raporî sero vindêriya. Raportor Katî Pîrî raporê xo de eleqe anto meseleya kurd ser û siyasetê lej ê AKP rexne kerdo. Raporî de meseleya kurd zey meseleya siyasî ardiyaya ziwan û AKP ra waziyayo siyasetê lejî virado û ageyro muzakereyanê aştî ser.
Kemîkerdinê heqan
Katî Pîrî raporî de rewşê awarte û qedexeyê kûçeyan jî îşaret kerdo û vato, gerek derhel peyniyê enê rewşî biyariyo. Raporî de eleqe anciyayo kemîkerdinê heqan û azadiyan jî ser û vajiyayo ki, hetê azadiyê fikir û çapemeniya peyser şiya. Eynî wext de Tirkiye ra waziya ki, qirkerdinê ermeniyan ê serra 1915 jî bisilasno.
Raporê serra 2015 ê derheqê Tirkiye de, xeylê munaqeşey bî. Wezîra Pawitinê Holanda û Seroka Demîn ê Jûwîna Ewrupa Jeanine Antoinette Hennis-Plasschaert jî roniştinî de qisey kerd. Wezîra Holandij eleqe ant binê ligan girotinê heqanê merdiman ê sûkanê Kurdistanî û vat ki, ê bi xo jî, bi fikarê.
Meseleya Kurd
Nameyê Koma Xirîstiyan ser Renate Sommer jî qisey kerd û vat ki, Tirkiyeya derheqê meseleya kurd û heqanê merdiman de peyser şina. Temsîlkarê Koma Lîberal Demokratan jî vat ki, hinî kes emel nêkeno, Tirkiye bibo endama Jûwîna Ewrupa.
Koma Çep terorê dewleta tirk ê Kurdistan de vist vîrî û bi ziwanê tûja dewleta tirk rexne kerd. Koma Çep wast ki, nameyê PKK lîsteyê terorî ra vejiyo. Badê munaqeşeyan, raporê derheqê Tirkiye de, bi zafê rayana qebûl bi. Eno raporê ki zey rapor en giran ê hetanî nika hesibiyeno rastê nêrazibiyayinê rayverînê tirk ame. Rayverînê tirk vat ki, iyê raporî qebûl mekirê û peyser açarnê.