Labelê verba no waştişê heqdar a şarê kurd de dewleta tirk bi nameyê ‘Qedexeya vejîyayişê kûçeyan’ Kurdistan de rewşa îstîsnayî îlan kerd. Hemşaredarê Farqîn, Nisêbîn û Sûrî zî wezîfeyê ra ameyî girewtiş. Tewr peynî Cizîr de dewleta tirk 21 kurdî qetil kerd.  


Persfektîfê pergalî

Îdareyê Xoser a DBPe zî waştişê şarî ya xorayîrberdişî hokeya îdareya xoser de girewt dest û mîyanê rojê 18 û 19’ê êlule Amed de konferansek viraşt û konferansî ra hetê hemşaredaran de bi hezaran kesî beşdar bîyî. 

Namzeda HDPe û nuştoxa ma Nesrîn Şanli (Namdar) zî beşdarê no konferansî bibî û Şanli rojnameya ma ra qise kerd û vat ke zeyke ê yeno zanayiş ke pergalê netewe dewletî de cay cenî her tim bin de yo û wina domna: “Çirî cay cenî hetî ser de nêbîyo. Pergalê kapîtalîst cenî kerdo meta, No ser zî cenî qet nêeşkîyaya ziwanê xo ra xizmet bikera. Hetê xebat de, hetê wendiş de çirî xoaverbîyîş nêwaşto bibo. No esasê dewletan o. Di pergalê xoseriya demokratîkî de cayê cenî û mêrde sey yewbînan a. No ser zî seba heme şaran pergalê tewr weş, xorayîrberdiş o, encax xorayîrberdiş de şarî eşkenî ziwan û perwerdeya xo aver bero.”


Walî zî bêro weçinayiş

Hetkardoxa hemsereka Şaredarîya Akdenîzî Sebahat Gençtarîh Cebe zî DÎHAye ra qise kerd. Cebe vat ke nika Tirkîyaye de demokrasî, faşîzanî reyde yena şuxilnayiş û qalîkerdişê xo wina peynî kerd: “Hetanî nika şar qet baş nêame temsîlkerdiş. Sifteyin HDP îradeya şarî Meclîsî ra kirişt. Nika Kurdistan de walî û qeymeqam bi tayînkerdiş xebityenî, la ganî walî û qeymeqam hetê şarî biameynê weçînayiş.”


Çirî pergalî ra tersenî?

Cebe aşkera kerd ke dewleta tirk pergalê faşîzan reyde wazena her tim îqtîdarê xo bipawa, qet seba çareserîya probleman zî xebat nêkena û wina vat: “Dewleta tirk û hukimatê AKPe qey xorayîrberdişî ra, qey îradeya şarî ra tersenî. Nika Swêdî de 24 kanton estî, heme kanton zî cîya cîya yenî îdarekerdiş. Swêdî de çew rîyê ziwan û dînê xo ra nîno kiştiş. Ma wazenî xorayîrberdiş reyde verê faşîzmî bêro girewtiş. No ser zî ma xorayîrberdişî ra zaf muhîmî danî, xorayîrberdişî ra tersayîş zî çîyo ke şaş o.”    


 NAVENDA XEBERAN