Endamê Komîteyê Rayverîn ê PKK Murat Karayilan tewrê programê taybet ê Stêrk tv’î bi û derheqê muhîmînê weçînayinê 7’ê hezîrani, demê çareserîn û hetkarînê AKP û çeteyanê DAIŞ de mesajê muhîmî day.
Karayilan ard ziwan ki weçînayino hem qandê Kurdistan’î û hem qandê pêrinê Tirkiye zaf muhîmo û wina vat: “Qandê îradeyê kurdan û çoşmanê demokratîk bikirêşiyo meclîs, lazimo bendê %10 ravêriyo. Wexto ki bend ravêriyo, heme hesabê AKP bixeripiyê. AKP heme planê xo qandê bend’î kerdo hedre. Xora o bend vera îradeyê şarê kurd roniyayo. AKP wazena îradeyê şarê kurd gasp bikiro û bi neheqîna emrê îktîdarê xo derg bikiro. Gerek heme kurd û çoşmayê demokratî vera AKP bibê jew. Banê HDP bin de bêrê pê het. Xora nika ra ayseno, HDP bi ser kewna. Coka adir kewto zeriya AKP û Erdogan’î.”
Karayilan’î damusnayin ki heme namzedê kurd ê AKP, merdimê JÎTEM’ê û wina vat: “Verî AKP miyan de heveyê namzedê xo nêroto estîbî. La belê nika winî niyo. Pêro merdimê JÎTEM’ê. Kesê xo rotoyê. Coka lazimo şarê kurd û heme çoşmeyê demokratîk nay bivînê û winî hereket bikirê. “
Karayilan’î derheqê demê çareserîn de jî wina vat: “AKP çareserîn ra, bê îradekerdinê kurdan fam kena. Xora çiyo ki nika kena jî, eynî çiyo. Wazena kurdan bê îrade biterno û siyasetê asîmîlasyon û îmha bi rayanê bînana dewam bikiro. La belê demê çareserîno ma qalê ci kenê, demo ki Rayver Apo bi kedê girda beno raveyo. Bi îmkanê Rayver Apo, çareserînê meseleya kurd resayo jû noxteya muhîm. Na saet ra tepiya, hinî kes nêşeno verniyê nay bigiro. Wexto ki HDP bi quwet şiro meclîs, o çax keso meşo vera demê çareserîn vejiyo. “
‘AKP û Erdogan dîndar niyê, nijadperestê‘
Endamê Komîteyê Rayverîn ê PKK Murat Karayilan’î eleqe ant sûîstimalînê dîn û hetkarînê AKP û DAIŞ jî ser û wina vat: “AKP dînî sûîtimal kena. AKP û Erdogan dîndar niyê, nijadperestê. Biewnê dîmenê bi hezaran ton tifîngê çeteyanê DAIŞ û El Nûsra ra rîştî vejiyay werte. Bi enê tifîngana kamî kişiyay? Ê pêro misilmanî nêbî? Ê tifînganê AKP, sûka qedîm Helep kerd xirabe. Min verî jî vatibi. AKP vera kurdanê Rojawa, bi resmî lej îlan kerd. Erdogan’î Rojawa kerdo xetê xo ê sûr. Peyniyê lejê vera kurdan ê Rojawa de, AKP esta.”
Karayilan vist vîrî ki xeylê cayan eşîretî tewrê HDP biyê û vat: “Çiyê winayin xizmetê rind ê qandê jûwîna kurdan kena. Ancî xeylê cayan koruciyan jî şaşînê xo dî ageyray. Hinî vera gerîla tewrê lejî nêbenê. Eki dewlet biwazo înan fina birêşo, lej wa tewr mebê û aştî het ca bigirê.”
Karayilan’î cewab da zûranê Erdogan û AKP ê derheqê viraştinê meydanê tiyareyan ê Geverî de û vat: “Erdogan û Davutoglu îdîa kenê ki, înan vera astengînê gerîla meydanê tiyareyan viraşto. Iyê zûrî kenê. Ma Newroz’ê 2013 de destûr da. Bi destûrê ma viraziya. Qandê şarê ma ê Colemerg çiyê rindo. La belê talukeyê wijay qandê tiyaranê lej bixeftinê esto. Wa çimê şarê ma ê Colemerg akerdebo. Eki çiyê winîn bikirê, wa bikewê dewre û meviradê.
NAVENDA XEBRAN