Karayilanî dîyar kerd ke ‘heta nika Rojawanê Kurdistanî vera Tirkîya de guleyêk daxî nêteqnayo û çalakîyêk nêviraşto’ û qiseykerdişê xo wina domna: “Xora hûmara înan kemî ya û heta nika binê rejîmê Sûrîye de ameyî pelçiqnayîş. Nika Sûrîye de rewşe bedilîyaya û şert û mercê statuyî vejîyayo orte. Labelê seba ke PYD ewja de beno wayîrê statuyî, ê hezm nêkenî û vanî ‘O PKKyî yo’. Şima kura ra zanî PKKyî yo. PKK dîyar o. Sey rêxistinêka şorişger vera dagirkerîya dewleta tirkî de têkoşîn dano. La seba ke PYD zî kurd o, vanî PKKyî yo. Seba ke Rojawanê Kurdistanî temam nêbo, wazenî bidekewî mabêne. Reyna wazenî hetê mîyanneteweyî de bidekerî lîsteya terorî û bi no hawa Şorişê Rojawanî bifetesnî.”
Başûr de zî wina kenî
Karayilanî dewamê qiseykerdişê xo de va ‘dewleta tirk wazena Mûsil an zî Telafer de, reyna Kerkûk de xo bica bikero û bi no hawa statuyê Başûrê Kurdistanî orte ra wedarno’ û wina dewam kerd: “Ê wina fikiryenî; çimkî heta ke Başûr de statuyêk kurdan bibo do şarê Vakur, Rojawan û Rojhelatî zî statu biwazî. Seba nêyî zî dewleta tirk kayanê xo erzena dewre. Mesele Mîsakî Milî ana rojeve û vanî ma Lozanî qebul nêkenî. Erdoganî qiseykerdişê xo de vatbî ‘ya sînorê ma do hîra bibî ya zî do şenik bibî’ Ez tîya ra persena; ti do ver bi kura hîra bibî? Gelo ti do Şamî bigîrî? Nê. Beno ke çim veradayo Helebî, la raştîya xo de Heleb ra heta Mûsil û Kerkûk, heme wazeno. Nînan çimê xo sîya kerdo. Hêrişê cîdî estî. Ganî ti kes xo nêxapêno û lazim o her kes na raştîye bivîno.”
Stratejîyêk ortax
Karayilanî bale ant ser konseptêko newe ke vera qezencanê kurdan de erzîyayo dewre û va: “Dewleta tirkî seba ke heme qezencanê kurdan çin bikera, konseptêko newe eşta dewre. Eke sîyasetê kurdan nê talukeyî nêvîno, beno ke heme dewletê dagirkerî vera kurdan de biwerzî. Reyna eke siba no şer biqedîyo, o wext dewletê dagirker do herême mîyanê xo de pare bikerî. Ma hedîseya Cerablusî de dî; hêzê mîyanneteweyî ke nakokî mîyanê înan de esto, wexto ke babete bena kurd, heme benî yewe. Ganî sîyasetê kurd na raştîye bivîno. Ma serra 2013 de tayê nizdîyê yewîya neteweyî bîbî. Labelê nêresa netîce. Beno ke nika awankerdişê yewîya neteweyî zehmet bibo, la heme rêxistinê kurdan eşkenî bi perspektîfêk ortax yê neteweyî hereket bikerî. Seba cuyayîşê azade stratejîyêk ortax lazim o.”
‘Ma amadeyî ke mesûlîyetî bigîrî’
Endamê Komîteya Caardişî yê PKKyî Murat Karayilanî va ‘sey PKK ê amade yî ke qezencanê şarê kurdî Başûr, Rojawan, Vakur û Rojhelatê Kurdistanî de bipawî’ û wina va: “Ma amade yî ke no proses de çi bikewo milê ma, ma bikerî. Ma no het de teng nêfikiryenî. Lazimî nizdîbîyayîşê kûr û vînayîşo hîra lazim o. Ma vînenî ke mîyanê sîyasetê kurdan de nê munaqeşeyî estî û ma bawer î ke no het de do averşîyayîşêk bibo. Êdî cewabêko lazim o, ganî ma bidî dagirkeran. Ma leşkerê ti kesî nîyî û ma do xizmetê ti kesî zî nêkerî. Lazim o her kes bizano, kurd êdî tena yê xo yo û do tena seba xo bixebetîyo. Tîya welatêk o, tîya Kurdistan o.”
ANF / BEHDÎNAN