Amed de mektevanê Kultur û Huner yê Kultur ê dewan hetê perwerdeyê alternatîf nimûneyekê gird ê. Nê mekteban ra jew zî belda Pasûr Cixsê de hetê Şaredarîya Sûka Pîl yê Amed ra ama akerden. Mektebê Kultur û Huner yê Cixsê de bi kurdî qeçekan rê perwerde yeno dayene. Mektebî de hetê 2 mualîman (mamoste) 20 wendekaran rê perwerde yeno dayen. Dûştê sîstemê perwerdeyê asîmîlasyonîst yê dewlete, naca de perwerdeyê azad yeno dayen.
Hedef pawitişê kulturê kurdî yo
Çarçoveyê projeyê Şaredarîya Sûka Pîl yê Amedî de nî mektebê qezayanê Henê, Pîran, Erxanî û Pasûr de amey ronayene. Mûalîmanê mektebê Cixser ra Nûrcîhan Yilmaz aşkere kerd ke armancê ronayişê nî mekteban pawitişê huner û kulturê kurdî bî.
Yilmaz qiseyanê xo de hayr ant polîtîkayanê asîmîlasyon ser û va: ''Waxto ke ma sifte virene ameybî nê dewan ma hona rind dî ke polîtîkayê asîmîlasyonî ke bi destê dewlete yenê ramitene seyî (çitûr) resayê heta dewan. Malbatê ke dewan de weşî kenê zî bi domananê xo ra ebe kurdî qisey nêkene, hetê kultur û ziwanî ra jû bêhîsdariye est bî. E ke ma sero vindenê vînenê ke weşîya dewan kî rast nîya. Weşîya dewe pawitena kultur a. Nika weşîya dewan qedînayê, nika kultur zî wazenê biqedînê. Na rîwal ra armanca ma yo sifte domanan rê heskerdiş û pawitişê ziwan û kulturê xo da mûsnayiş o.''
Nûrcîhan Yilmaz aşkere kerd ke mekteban ra peyê hefte mavêna 10:00 û 12:30 de ziwanê kurdî ra heta huner, boya perwerde danê û qeçekan ra kayan kaykenê. Yilmaz veng da pêro malbatan ke hem serva hetê mezgî ra weşîya domanan û hem kî ameyena kulturê kurdî nê mekteban rê wayir bivejyê.
DÎHA/AMED