Hemserekê Pêroyî yê Partîya Demokratîke ya Şaran yo verên Selahattîn Demîrtaş ke demêko derg o tewqîfbîyaye yo, çend rojî verê mehkemeya ci estbî û mehkeme de serbest amebî veradayene. Herçiqas ke qerarê tehlîyebîyayîşî vejîya zî, Demîrtaş hîna zî tewqîfbîyaye yo.
Partîya Sosyalîstanê Ewropa (PES) seba Demîrtaşî îzehetêk da û waşt ke wa Demîrtaş demêko raver serbest bêro veradayene. Serekê PESî Sergeî Stanîşevî îzehet de wina va: “Tirkîya zîndan de tepiştişê Demîrtaşî reyde heqê ci û heqanê sîyasî yê şaranê Tirkîya îxlal kena. Ma verê cû zî vatbî ke tewqîfbîyayîşê Demîrtaşî sîyasî yo û amancê ci bêvengkerdişê muxalefetî yo.”
Stanîşevî waşto ke wa Demîrtaş serbest bêro veradayene û wina va: “Demîrtaşî tena seba Kurdan nê, seba heqê merdiman, azadî û demokrasîya Tirkan zî têkoşîn dayo. Tena sucê ci o yo ke seba Tirkîyaya averşîyaye û demokratîke têkoşîn dayo. Nêyî ver 3 serrî yo zîndan de yo.Ma do heta peynî destek bidî endamanê xo û heqanê înan bipawî.”
MA / AMED