DÎREN YURTSEVER / MA/ENQERE
AKP yew demo ke ser pêşnîyaza ‘Rayberîya Xocayî’ ser o xebat keno û na pêşnîyaza AKPî zî aşkera bî. Goreyê pêşnîyaza AKPî selahîyatê şaredarîyan, Wezaretê Bajarî û Dormeyî, Serekkomarî û walîyan ra yenî dayiş û xebatê malî, îdare û bazirganîye de zî verê selahîyatê şaredarîyan yeno girewtiş.
Pêşnîyaza AKPî ser o Serekwekîlê Koma HDPî Saruhan Oluç qise kerd û vat ke hîna pêşnîyaza AKPî Meclîsî ra nêameya, AKP wazeno heme selahîyatê şaredarîyan xo ra girêbido û wina vat: “Taybetî AKP şaredarîyê gird û şaredarîyê merkezan de vînîbîyayişêko gird cuye kerd. Seba ke newe rasteyê rantî xo ra awan biko, selahîyatê şaredarîyan xo ra wazeno bişuxilno. Armancê înan sîstemê merkezî hêzkerdiş o û demokrasîya xocayî zî têk berdiş o.”
Bajarê Tirkîyaye zî tayînê qeyimî
Serekwekîlê Koma HDPî Oluç dîyar kerd ke ê demo ke qeyim şaredarîyê HDPî ameyî kerdiş, hem komelkî hem zî muxalefetê sîyasetî hîşyar kerdê, nika AKP wazeno bajarê Tirkîyaye ra zî qeyim tayîn biko û wina dewam kerd: “Ma her tim vat, bi tayînê şaredarîyê HDPî îradeya şarê Kurd xesp kenê. Ewro şaredarîyê HDPî ra, siba zî şaredarîyê Tirkîyaye ra do hêriş bikê ma aşkera vat. Nika bi xespkerdişê selahîyetî, şaredarîyan xesp kenê, bi aşkera wazenê rejîmê tayinkerdeyan awan bikê. Ganî demokrasîya xocayî aver şîro, sîstemê faşîzmî hêdî hêdî awan beno.”
Hedef Stenbol o
Oluç aşkera kerd ke bi na pêşnîyaze, AKP wazeno rasteyê rantî newe ra desteser biko û wina qedîna: “Stenbol de AKP vînîkerdişêko zaf bi gird cuya, nika hedefê AKP sifte Stenbol û peynî zî şaredarîyê girde yê bîn ê. Seba AKPî şaredarîyê Stenbol, Antalya, Edene, Mêrsîn û Enqereyî zaf bi muhîm ê. Bi na gam AKP do meşruyetîya xo vînî biko. Armancê înan çimeyanê welatî desteserkerdiş o. Bi Kanalê Stenbolî zî wazenî do tena hetgirê xo ra rasteyê rantî awan bikê.”