Nurîye Gulmene û Semîh Ozakçayê ke bi Qerarnameyê Hukmê Qanûnî de (KHK) karê xo ra ameybî îxraçkerdiş, seba ke tepîya biagerî karê xo, grevê vêşanî daybî destpêkerdiş. Grevê înan roja 176. de dewam keno.
Babete ser o Avûkat Engîn Gokogluyo ke Gulmene û Ozakçayî reyde pêvînayîş viraşt, derheqê rewşa înan de malumatanê muhîman pare kerd.
Avukat Gokogluyî Nêweşxaneyê Zîndanê Sîncanî de Gulmene û Ozakçayî zîyaret kerd. Gokogluyî va ‘wexto ke mi Nurîye reyde pêvînayîş kerd, aye rakewte bîye ez zî masa de ronişte bîya’ û wina dewam kerd: “Her tim pêvînayîşê ma masa ser de bîyêne, labelê na rey Nurîye nêşînaye biwerzîya. Gurçikê Nurîye de dej estbî û 4 rojî verê ra nata serd kena. Herçiqas ke wina yo zî lingê aye veşenî. Reyna rayîrê îdrarî de enfeksîyon esto. Mi Semîhî baş dî.”
Silamdayîşê înan daxî qedexe yo
Gokogluyî qiseykerdişê xo de bale ant şert û mercê înan ser û wina va: “Eke hepsîyêk hepsîyê bînî nêvîno, nameyê nêyî tecrîd o. Nurîye û Semîh hucreyêko padaye de yenî tepiştiş. Şert û mercê înan bi serê xo îşkence yo. Ê tena wazenî heskerdoxê înan hetê înan de bibî. Çimkî no hêz dano înan. Her tim tehdîdê bi zorî mudaxalekerdişî esto. Îdareyê zîndanî hewl dano çalakgeran tena verabido. Nurîyeye pêvînayîşo peyên de va ‘nê şert û mercan ver ma xover danî. Eke şert û merc wina nêbîyênê, gelo ma do bişînayêne wina xover bidayêne. Ma do grevê xo bidomnîy.”
Mehkemeye waşto ke wa bîyarê roniştişî
Gokogluyî peynîya qiseykerdişê xo de qala doza Gulmene û Ozakçayî kerd û wina qedêna: “Mîyanê demêko kilm de amadekerdişê pawitişî mumkin nîyo. Dosyaya ke derheqê înan de ameya amadekerdiş, mîyanê aye veng o. Mehkemeye seba ke Nurîye û Semîh bîyarî mehkeme, nuşteyêk nuşta. Ma zî wazenî wa bîyarî mehkeme. Ma heme avûkatan zî dawetê doze kenî. Muwekkîlê ma do mîyanê çimê înan ra biewnî û cewab bidî persanê înan. Muwekkîlê mi çi sucdar î û çi zî nêweş î. Ganî nêyî fam bikerî. Wa nêyî fam bikerî. Ma veng danî heme hetanê demokratîkan ke wa beşdarê roniştişê doze bibîy.”
ANQARA