Bi şero topyekun ke AKP weçînayîşan ra dima dayo destpêkerdiş bînayê HDPe yenî hedefgirewtiş. Zaf cayanê Tirkîya de grubê nîjadperest hêrişê bînayanê HDPe û şarê kurd kenî. Nêy hêrişan sero zaf zirar ame dîyîş. Babete sero hemsereka HDPe ya Şaristanê Wanî Derya Havya ard ziwan ke her çalakîyê ke yeno kerdiş yew sebeb û encamê ci esto û wina domna: “Nêy hedîseyî semeda ameyoxê welatî zaf taluke yî. Çi heyf ke bertekêy ke demokratîk nîyê semedê ma hemînan taluke yî. Labelê ma sey HDPe hemverê nê hêrişan têk nêşonî.”
Bi al xapênenî
Havya dergeyîya qalîkerdişê xo de ciresna ke dewlet her tim ser şarî şero psîkolojîyî dano meşnayîş û wina vat: “Çîyo ke ma zîhnîyetî de bedilna, pergala ke bi serran o nêverdaynê ke şar muhakeme bikero, eciz kerd. Nêzdbîyayîşê ma ya şarî demo ke kilm de ma dekerd mîyanê partîyanê girdan. Şar her tim vatişê ‘Al dest ra şono, wazenîy olê ma çin bikêrî’ rey ameynê xapênayîş. Êy ke nê xapênayîşî kerdênê, duştê xo de merdimê polîtîk veynay. Wazenî her tim HDP sîyasetî ra dur bitepişî.”
Çîyek nêdanon qezenckerdiş
Havya bal ant ser kaosê ke herem de esto sero û wina qalîkerdişê xo domna: “Ma hîna zî hetê pîyacuyayîşê şaran de yî. Encamê weçînayîşê 7’ê hezîranî zî mojna ke şarê Tirkîya ma qebul kerd. Çîyo ke ma tersneno hêrişê faşîst ke rayîrberê nê welatî wazenî dişmentî mîyanê şarî de bidî awankerdiş o. Çimkî ma wazenî wa domanê ma, ma ra dima mîyanê aştî û biratî de bicuyî. Kesê ke nê hêrişan kenî yan zî danî kerdiş zî weş zanî ke nê hêrişî nêbenî çareser û semedê ameyoxê welatî zî çîyek nêdano qezenckerdiş.”
Sîyaseta înan de exlaq çino
Havya qalîkerdişê xo wina peynî kerd: “Semedê desthilatdarî antişê welatî ya mîyanê kaosî çîyo ke bêexlaqî yo. Ma nêwazenî înan rê bawer bike. Mîyanê şarî de awankerdişê vatiş û hîsêy dişmentî bi xo çîyo ke exlaqî nîyo. No semed ra vatişê ke Rayverê Şarê Kurd vano ‘Lazim o mîyanê komelî de kesêy ke vindertişê înan ya polîtîk esto, bibo’ raşt o. Vindertişê exlaqî her çî ra muhîmêr o. Labelê ravêreyeya ke ma tede de sîyaset bi exlaq nîno rayîrberdiş.”
JINHA/WAN