Hemserekê Meclîsê Caardişî yê Kantonê Efrînî Osman Şêx Îsayî derheqê bazarîya ke Heleb de ameye viraştiş, kiştişê sersefîrê rûsî û kombîyayîşo ke Moskova de ame viraştiş de qisey kerd.
Şêx Îsayî va çi şarê Sûrîye û çi muxalefet xemê Tirkîya de nîyo û wina domna: “Tirkîya bi heme hêzê xo hewl da qezencanê kurdan çin bikero. Heleb de ame dîyayîş ke hedefê Tirkîya şîyayîşê Esedî nîyo, cok ra grûbê ke girêdayeyê Tirkîya bî, bi otobusan herême ra ameyî vetiş û neqlê Îdlîbî bî. Do tîya ra zî seba dagîrkerdişê Tirkîya ser ra derbazî herêma Şehba bibî. Tirkîya do bi nê çeteyan vera kurdan de rayîrêko newe biceribno. Xora heme grûbî Heleb ra nêvejîyayî; tayê teslîmê hêzê YPG/YPJyî bîyî, tayê zî keyeyê xo de roniştî. Peymano ke mabênê Rûsya û Sûrîye de virazîya tena Heleb ser nê, heme Sûrîye ser de tesîr kerd. Sîyaseto ke Tirkîya bi serran o ke Heleb de meşnena, bi husran qedîya.
Aqûbetê ci eynî yo
Şêx Îsayî dewamê qiseykerdişê xo de bale ant kişîyayîşê sersefîrê rûsî Andrey Karlov û kombîyayîşê Rûsya, Tirkîya û Îranî û qiseykerdişê xo wina qedêna: “Polîso ke sersefîrî kişt, polîsê Mudurîya Asayîşî de wezîfedar o û no zî nîşan dano ke sîyasetê AKPyî ra cîya nîyo. No hedîse nîşanê ma dano ke hêzê ke Tirkîya piştî dana înan, ge-ge kontrolî ra vejîyenî. Kombîyayîşo ke suîkastî ra dima Mosova de ame viraştiş, rojeva kombîyayîşî de şarê Sûrîye û sîyaset çinêbî. Cok ra ma eşkenî vajî ke no kombîyayîş sernêkeweno. Çimkî verê cû Ewropa de zî kombîyayîşê Cenevreyî amebî viraştiş, la ti netîce nêamebî girewtiş. Netîce de yê ke vînî bikero, do Tirkîya bo, aqûbetê Erdoganî zî do sey Saddamî bibo.”
ABDURRAHMAN GOK / DÎHABER / EFRÎN