Bi nizdîbîyayîşê weçînayîşê 24ê Hezîrane, xebatê weçînayîşî zî her ke şono zêde benî. Cayê ke xebatê weçînayîşî tede yenî domnayîş ra yew zî Ewropa ya. Ewropa de bitaybetî Fransa û Almanya de lez dîyayo xebatanê weçînayîşî û na çarçewa de xeylê cayan de kombîyayîşê şarî ameyî viraştiş.
Bajarê Marsîlya, Toulouse, Parîs, Creîl û Rouenî yê Fransa de û eyaletê Wurttembergî yê Almanya de kombîyayîşê erjnayîşê weçînayîşî ameyî viraştiş û qala muhîmîya weçînayîşî ameye kerdiş. Nê cayan ra bajarê Toulouse yê Fransa de kombîyayîşê şarî ame viraştiş û Hemserekê KONGRA-GELî Remzî Kartal zî beşdarê kombîyayîşî bi.
Kartalî va ‘weçînayîşê 24ê Hezîrane seba heme şaranê Tirkîya hêvîya peyêne xelq kerdo’ û wina domna: “Êdî Erdoganî dî ke nêşêno rewşa krîzî ya Tirkîya bi şert û şurtê OHALî zî îdare bikero. Cok ra qerarê weçînayîşî girewt û nê qerarî bi MHPyî da vatiş. Seba ke HDP binê barajî de bimano, qanûnê weçînayîşî de bedilnayîşî viraştî. Ewro lîderê muxalefetî Selahattîn Demîrtaş tewqîfbîyaye yo û no zî nîşan dano ke Erdogan tengîyêka senîne de yo.”
Kombîyayîş ra dima Kolektîfê Piştîdayîşyewbînanî yê kurdan ke hetê partîyê fransayij û rêxistinê komelkî yê sîvîlî ra amebî awankerdiş, Remzî Kartalî reyde pêvînayîşêk viraşt. Pêvînayîş de qerarê delegasyonêk seba serbest veradîyayîşê Demîrtaşî, do şêro Tirkîya, ame girewtiş.
HDP do peynîya Erdoganî bîyaro
Heto bîn ra banlîyoya Evryî ya Parîsî de zî kombîyayîşê şarî ame viraştiş û nuştox Azîz Tunç sey qiseykerdoxî beşdar bi. Bi seyan kurdistanî û tirkîyayijî beşdarê kombîyayîşî bîyî. Kombîyayîş de Tunçî va ‘bawer bikerê ke ma do qezenç bikerî’. Ser nameyê Kongreya Neteweyî ya Kurdistanî qiseykerdişêk ame kerdiş û wina ame vatiş: “Ma Erdoganî reyde birayê yewbînan nîyî, nêbenî zî. Ma senî munafiqêk reyde benî bira. Wexto ke yeno hesabê Erdoganî vano ‘ti problemê mi birayê mi kurdan reyde çin o’. Senî problem çin o? Ti hende merdiman bikişe, Efrîn dagîr bike, talan bike. Dima ra vaje problem çin o. Ewro îttîfaqê ke kurd, elewî û heme neteweyan înkar kenî, estî. Ganî ma dormeyê HDPyî de bibî yew. HDP do peynîya Erdoganî bîyaro.”
Her raya ke bidîyo HDP muhîm a
Kombîyayîşêk zî herêma Creîlî ya Parîsî de ame viraştiş û Endamê Dîvanê KCDK-Eye Murat Ceylan û Nuştox Zîya Ulusoy zî beşdarê kombîyayîşî bîyî. Ulusoyî va ‘eke ma pîya têkoşîn bidî, o wext ma qezenç kenî, cok ra ganî herkes wayîrê HDPyî bivejîyo’. Dima ra Murat Ceylanî zî va ‘her raya ke bidîyo HDPyî, do vera tecrîd, operasyonê sîyasî û dagîrkerîya Efrînî de bivindero.”
Kombîyayîşo ke herêma Rouenî de ame viraştiş rê zî Hemserekê Şaredarîya Rayîrê Îpegî ya Wanî Veysel Keser û Tacim Yuksel beşdar bîyî.
22