Meste nê bêrro gerîllayê PKK dest kene ci, hetê başurê Kurdistanî ser sonê.    

Raştiye ke vajîne tîvarê mi hukumatê tirk rê çîno. Zerrê mira yeno ke na lawike vajîne: “… 38 heşt hona nêqediyo, tifonganê xo meverdê ra…”
Tabî jû na lawike esta, jû zî qewxa xedare yê 30 serranê peyenan esta. Nî 30 serrê peyenî mara vindarnayena qewxa çekdariye û ramitena rayade bîne wazenê.
Eke zerrê 30 serran de bi çekan pêrodayene de serkewtene û binkewtene nêbiya, o waxt mordem gune rayade bîne bicerebno.
Îşte Hereketê Serbestiya Kurdî na raye cerebneno. Bi metodedê bînî qewxa ramitene û heqanê xo restene.
Eke ma ewro sareberzîme, sayiya qewxa 30 serranê peyenan yê Hereketê Serbestiya Kurdî dero. Kam çi zono, na qewxa ke nêbiyenê ma nika sene hal de bîme. Leto jede yê Kurdan endî kamiya xo înkar nêkeno, kamiya xora nêsermayeno. Na qewxa ra avê, dismenî caverdîme, ma xo înkar kerdenê û kamiya xora sermayenê.
Hereketê Serebestiya Kurdî dewlete zaf kerde tenik, hama mixabin tam nêriznê. Çike pêro dugel û dewletanê bînan tornanê Osmanî rê yardim kerd.
Xelet meyero famkerdene, herb wastene mi nêkena û ez nêwazen. Kurdan hora ver ra na het herb nêwastenê, hama verva dewleta terorîste mecburî mendî.
Ez bara xorê van, kamî ke pêronêdo, o haştiye ra zî famnêkeno. Na rîwal ra ça haştiye bibo, naye ser kam ke do pêro, o qerar dano. Marê fikrê xo vatene manena.
Hama taye çî estê ke mordemî re zaf zor yenê.
Hata nika tersunê gerîlla ver eskerê dewleta terorîste nêşîkîyenê her ca kuyê. Nika peyseronciyayena gerîlla xorê jê firsedî vînenê, her ca de qereqolan virazenê.
Tam naca de gerîlla nika ra kuna ra ma vîrî. Tersê gerîlla arteşa dewleta terorîste rê bes bî.
Kurdanê ke vatenê, gerîlla ke nêbo, herb nêbeno, eskerî ma rehet verdanê, nika gune bisermayê. De hayde şerê meverdê dewleta terorîste her ca de qereqolan virazo!