‘Peyser meancê, betal bikerê’
Bi seyan cinîyî seba ke ‘Pêşnûmeyê îstîsmaro zayendî’ ke AKPyî seba ke bikero qanûn ardbî meclîs, protesto bikerî meclîs ver kom bîyî û reaksîyonê xo nîşan dayî û vatî ‘pêşnûmeyî peyser meancê, betal bikerê’
Goreyê pêşnûme îstîsmaro zayendî ke hetê AKPyî ra ame rojdem, cinîya ke raştê îstîsmarî biameyêne do keso ke îstîsmar keno reyde biameyêne zewejnayîş. Vera nê pêşnûme de xeylê kesî reaksîyon nîşan dayî. Hukmatê AKPyî zî seba ke nê pêşnûme bikero qanûn ard meclîs.
Cinîyî zî seba ke nê pêşnûme protesto bikerî, meclîs ver de kom bîyî. Bi seyan cinîyî ke Berê Dîkmenî yê Meclîsî de kom bîyî, îzehet dayî çapemenîye. Cinîyî çalakîye de vatî ‘Se beno wa bibo ma do nê pêşnûme qebul nêkerî.’ Cinîyî çalakîye de pankartê sey ‘Veyva doman çin a, camêrdo tecawizkar esto’, ‘Dest menê domanê mi’, ‘ma nê pêşnûme qebul nêkenî’ kiriştî. Cinîyî çalakîye de silogananê ‘Şarî re nê, endamê Ensarî rê barîkat’, ‘AKP yo dizd, qatil û tecawizkar’ qîrayî.
Ganî pêşnûme bêro çinkerdiş
Temsîlkara Platformê Ma Do Kişyayîşê Cinîyan Bivindarnî yê Tirkîya Gulsum Kave çalakîye de qisey kerde û wina va: “Ganî no pêşnûmeyo ke sey belgeyê şermî kewto tarîxê Tirkîya, orte ra bêro wedarnayîş. Ma xebere girewt ke no pêşnûme peyser ameyo antiş, la ma vanî wa peyser nêro antiş, wa bêro çinkerdiş.”
‘Ma do destûr nêdî’
Platformê Cinîyanê Anqara ra Yurdagul Çapate bale ant nê pêşnûme ser û va: “Seba peyser antiştê no taxlaxo ke îstîsmarê zayendî meşrû keno û beno sebebê serbestveradayîşê tecawizkaran, ma do têkoşînê xo bidomnî û ma do destûr nêdî ke bibo qanûn.”
Çapate ra dima Sereka Polê Cinîyan ya CHPyî Fatma Koseye zî va ‘wazenî bi nê pêşnûme kerdoxan bipawî û zewajê domanan meşrû bikerî’ û wina va: “Ganî qanûnî vera komel û ehlaqî nêbî. Ma veng danî Wezîrê Polîtîkayê Komelkî û Keyeyî û parlamenterê cinîyan û vanî ma tîya de yî, şima kura de yî?”
Polîsan mudaxale kerd
Wexto grûbê ke waştênê beşdarê çalakîye bibî, hetê polîsan ra mudaxaleyê înan ame kerdiş. Endamê Halkevî ke Çatrayîrê Akayî de ameyî têhet, waştî ke bi rayîr şîyayîş xo biresnî meclîs, la hetê polîsan ra ameyî astengkerdiş. Wexto ke cinîyê ke endamê Halkevî yî, waştî ke meşyayîşê xo bidomnî, raştê gazê polîsan ameyî. n DÎHABER/ENQERA