Bi dîyarbîyayîşê tarîxê weçînayîşê herêmî, lez dîyayo operasyonanê sîyasîyan û heta nika xeylê sîyasetmedar û xebatkarê partîyanê HDP û DBPyî ameyî tepiştene û tewqîfkerdene. Nê operasyonan ra yew zî vizêr Dêrsim de ame viraştene.
Vizêr polîsan qezayanê Pîlemûrîye û Pêrtagî yê Dêrsimî de saetanê serê sibayî de eştî xeylê keyeyan ser û 8 kesî tepiştî. Netîceyê sereştişan de Îdarekarê HDPyî yê bajarî Ulvî Gultekîn, Riza Dalkiliç, muxtarê dewa Dere Hayrî Dogan, Takî Erdogan, Kazim Yildiz, Adil Korkmaz, Alî Sari û Erdem Dogru ameyî tepiştene. Kesê ke ameyî tepiştene, merkezê Dêrsim de yenî vindarnayene. Sebebê tepiştişan nîno zanayene û yeno vatene ke beno ke hûmara tepişteyan zêde biba.
Heto bîn ra ame musayene ke Îzmîr de çarçewaya operasyonanê sîyasî de 9 kesî ameyî tepiştene. Ame vatene ke 9 kesî bi îdîaya ‘propagandaya rêxistine kerdî’ ameyî tepiştene. Reyna Anqara de zî akademîsyen Cenk Yîgîter ame tepiştene.
AMED