SAFÎYE ALAGAŞ / JINNEWS/AMED
Çarçewaya tehqîqatê Kongreya Komelê Demokratîke de hemşîre Salîha Aydenîza ke 19ê temmuze de ameybî tepiştiş û 22ê temmuze de zî tewqîf bîybî, dima ra serbest ameybî veradayîş.
Nika zî îdîanameyo ke derheqê Aydenîzî de ameyo amadekerdiş, hetê Mehkemeya Cezaya Girane ya 10. ra ame qebulkerdiş. Goreyê îdîanameyî derheqê Aydenîze de bi îdîaya ‘rêxistine awankerdiş û îdarekerdiş’ 10 serrî ra heta 15 serran ceza yena waştiş.
Îdîanameya Aydenîze de awanbîyayîşê KCDyî, hedefê bi hawayo hîra ca girewt. Reyna îlankerdişê xoserîye ya KCDyî û sewbîna çîyê bînî estbî. Îdîaname goreyê şahido nimite yê bi nameyê ‘Mercek’ ameyo amadekerdiş. Îdîaname de meşîyayîşo ke seba destekdayîşê prosesê bêpêrodayîşî, Forumê Sosyalî yê Mezopotamya, pîrozkerdişê 8ê Adare Roja Cinîyanê Dinya, protestokerdişê sîstemê perwerdeyî yê 4+4+4î û sewbîna çalakîyî suc hesibîyayî.
Ameyo îdîakerdiş ke Aydenîze tedawîya 2 YPSyîyan kerdo. Heto bîn ra îxraçbîyayîşê Aydenîze zî sey delîlî mîyanê dosya de cayê xo girewto.