Lîteratûrê ma eve qesû bî. Şîîrê qomê ma kilamû de bî. Ma lîteratûrê dîna zonûnê sarê teverî de doz kerdene û wendêne. Her waxt û mirode zerrê min bî, min waştêne ke lîteratûrê dîna biçarnîne kirmanckî. Şaîrê dînya ke her zon de wanînê, ma ça kirmanckî de mewanîyê? Min ke nî şîîrî her caê dîna ra kerdî arê, ardî pêser, zono ke min Dêkûnê xo ra haletî gûreta, çarnay o zon, mi rê henî ame ke dîna kirmanckî de qesey kena. Raştîye ke vacîne, jê domonû bîne sa. Ju kî nîya vacîne, zonê ma de hata nika karo de nîanên çînê bî, no kar û emego de nîanen hona sifteo. Min, no Antolojîyê xo sero hama, hama nêjdîye des serrî gûrîyûne. Gegane ju çarnayîsê şîîrî sero eve asmû vinetûne. Serba ju çekûy, min welat rê tel kerdene ra, hukimûnê ma ra pers kerdene. Wastena min, zono de naylon mebo, çîyo de hewl bêro werte. Sayirûnê dîna ra şîîrê ke mi çarnê zonê ma, nî şîîrî jê çarnaîs nê, sayike kirmanckî de nûşîyê, gûnê qomê ma, ci ra hênî thom bicêro, wendegê ma kultirê sarûnê bînû nas kerê, xorîyên û şîrênîya zonê ma bivênê. Çike ju zon kûltûrûnê bînû ra çiqa ke ame têrî, nas bî, honde kî avêr sono!”
Jele wina dewam kerd: “Înson ke şîîr sero gûrîya, şîîr nûsna, vîneno ke şîîr can û royê zonîyo. Şîîr honde kultir û zon ra giredayîyo ke, vanê, şîîr nêçarnîno. Raştî ke, min ke dest kerd ci, na pirtûkî sero gûrîyûne, min be xo kî no dî, şîîr nêçarnîno, newede nûşîno. Eke şîîr çarnîya, bingê şîîrî, vaten û wastena saîrî gûnê bêro ra zon. Hama no qese be qese nêbeno. Verê coy mane danîno ci, ju kî kamcî waxt de nûşîyo, kultirê o waxt çitûrî bîyo, saîr nî çitûrî ardê ra zon, nî pêro, zono ke çarnîyo, gûnê manê xo reyna o zon de bivecîyo. Çîyo ke min cor de nûsno, min nî pêro pîya çim ver de gûretî. Çiqa ke destebera min ra ame, vatena saîrî, kûltûr û karekterê zonê ma de nî ardî têlewe.”
Pirtûko sifteyin
Xitamê peyenî de wazon tayê çî simarê vacîne. Pirtûkxanê Belge de, hata nika zonê ma kirmanckî de pirtûk nêvecîyo, pirtûkê min, pirtûko sifteyo. Qedir giran, nuştox û sîyasetkar, Ragip Zarakolû, ma nêsikitîme, Kirmanckî de di elfabey qewil kerdî. Elfaba Vate û elfaba ma C. M. Jacobsonî. Ragip Zarakolû, na het ra serba zonê ma, serba qomê ma, ju gama de hewle estê, îtha ra wanûne, wes û war bo.
No Antolojîyê min de 21 welat ra 70 saîrê namdarî, nêjdîye 300 şîîrî estê. Tey kamcî saîro namdar çîno ke! Mevlana ra bîcêrîmê, heta Nesîmî, Omer Hayyam, Fûrûg Ferrûhzad, Şîrazî û Dante yê.
BERLÎN