PÎTENE

Rast a, mordem dewlete ra gune tewa mepiyo, hama ebi xo zî gune jû game bierzo. Waxtoke mordemî seweta karardena heqanê xo game nêeste, o waxt dewlete ra çiyê pîno.
Sîiyasetvanê kurdî vanê: “Ma dewlete ra tewa nêpîme” la heto bîn ra diyalog û muzakere ra zî qeseykenê. Vanê: “Asma hezîrane vêrde ra, 15ê asma cotmehe vêrd ra, hama hukumatê AKP hona gamê cîddî nêestê.” Na zî yena manê pîtene, hukumatê tirkî ra çiyê pîtene.
Onca siyasetvanê kurdî her tim vanê: “Ma nêpîme ke mesela se serran zerrê 2-3 serrî de halbibo...” Nî vatîsê niyanenî heqa siyasetvananê kurdî niya. Ma gune seweta rew halkerdena mesela bigureyîme. Kurdan zaf bedelê girşî dayî. Na semed ra tabî mesela gune rew halbibo. Na mesela çiqas rew halbibo, seweta ma honde rind o. Ma ke vat na mesela se serren a, zerrê 2-3 serran de halnêbane, o waxt hukumat û dewleta gonewere vanê: “Waxtê ma esto, hata 2023 ya zî 2071 de na mesela halkeme.”
Vatîsê siyasetvananê kurdan barê hukumatê AKP kenê senik. Ma tam eksê nî vatîsan gune vajîme: Dewleta terorîste na mesela gune desinde halbikerê û hukumatê AKP sero zordestiye jede kerîme.
Kurdan verva dewleta gonewere herb kerd, gonya xo dê, hama dewlete ra qeyta nêherdiyayî. Nika waxt amo, ma gune dewleta tirkî ra biheredîme.
Pekî na çitur bena?
Ma gune tirkî endî çê xora, kitavê xora, çapemeniya xora, kilmek dîna xora vejîme. Endî na îtaqetê xo jû het erjîme: Ma ke tirkî qeseynêkerd kes ma famnêkeno.
Mektebanê xo rakerîme, domonanê xo zonê mayan de perverde bikerîme. Her ca de zonê xo biyarîme kar, memuranê dewlete de zonê xo qeseybikerîme.
Xorê Rojavayê Kurdistanî numune bicerîme. Qomê ma yê rojavayî hetê ra herbode giran rameno, hetê ra dezgê xo nêro, domonanê xo zon û kulturê xo de perverde keno.
Ma qey nêkerîme. Ma kamî ra çi pîme?
Dewleta tirkî mara vana şerê, ma nêsome.