MAHMUT RUVANAS MA/BIDLÎS 5 dewê ke mabênê qezaya Tetwanî ya Bidlîsî û bajarê Wanî de yî, serranê 90î de ameybî veng kerdene. Dewê ke serranê 2000î de ameyî têhet û Kooperatîfa Averşîyayîşî ya Zîretî ya Kavarî awan kerdî. Kooperatîfa ke 2009 de ameye ronayene, her ke şono hîna gird bena û aver şona. Kooperatîfe nihê, fasulê û sewbîna çîyan resnena û hingimên xelq kena. Serekê kooperatîfe Gurgîn Karabeyî dîyar kerd ke ê bi 3 cinîyî dest pêkerdî û ewro 40 cinîyî tede xebetîyenî. Karabeyî va ‘erdo ke kooperatîfe ser o awan bîya, erdêko bereketin o’ û wina dewam kerd: “Zozan û gole estî. Ma serranê 2000î ra pey agêrayî dewanê xo. Şar hetê ekonomîye de zeyîf bi û cok ra ma qerarê awankerdişê kooperatîfe da.” Karabeyî dewamê qiseykerdişê xo de wina va: “Ma dewlete ra ti hetkarîye nêgirewt, bi temamî bi hêzê xo yê cewherî awan kerd. Cok ra ma xeylê kooperatîfan ra cîyayêr î. Armancê ma o yo ke ma merdimanê xo mihtacê ti kesî nêkerî. Çîyê ke ma xelq kenî yan zî resnenî, rayîr ser o roşenî. Kooperatîfe de nika 40 cinîyî xebetîyenî û ma nika hewl danî hîna zêde cinîyan bidî şuxilnayene. Çîyê ke yenî rotene, mîyanê cinîyan de bi hawayo sey yewbînan yenî pare kerdene.”