Piyagurenayîsê kurdan û tirkan

Tabî, nî mordemî waxtoke na piyagurenayîs sero qesey kenê, kurdan ra leborîne nêwazenê. Ya zî dewleta xora nêvanê ‘ma kurdan rê neqiye kerda, gune cira vajîme ma efbikerê.’
Nê, nê, çiyo niyanen nêvanê.
Çond reye ma tertele kerdîme, qirkerdîme û hata nika hona ma înkar kenê, era xo vîrî nêanê.
Reye peye xo de niyanêdanê, çitur dere û derxuleyî bi cendeganê ma kerdê pir.
Her cayê welatê ma de kommezelî vejîne werte, tey cendegê domonanê ma, cendegê bav û kalê ma estê. Dewleta terorîste hona leborîna xo nêwasta mara.
Tertelê Roboskî hona vijer bî. Hukumat û dewleta terorîste nêwazenê na tertele roşt kerê.
Jû komîsyon noro, pê homete xapneno hukumato tirk. 14 asmî ra tepiya zî her çî hona jê roza viren o.
Nî rozan de derheqê kurdan de en jede “rojnamevan” Abdulkadîr Selvî nusneno û “zonayîs” dano homete.
Na mordemek heşto peyen jû nustisê xo de niya vano: “ Dost û dismenê ma naye rind zonenê ke, jûbiyayena teqeta tirk û kurdan hereme de dengeyan vurnena.”
Jê xêle tirkan, Abdulkadîr Selvî zî nêqiya ke dewleta terorîste hata na roze kurdan rê kerda û kena, naye ser dewleta xora tewa nêvano. Teyna vano “ ma ke nika onca ebi kurdan ra teqeta xo jû kerîme, rojhilatê miyanî de beme wayîrê quwete û qesî.” Qalê 1925, 1930 û 1938 nêkeno.
4000 hezar dewê ma riznayî û vêsnayî naye ser zî “rojnamevan” û “roştberê tirkî tewa nêvanê, hukumatê xora seweta kurdan leborîne nêwazenê.
Selvî namê na Tirkiye zî “Tirkiye newiye” nano pira û niya devam keno: “Na yena o mane ke, tornê Sultan Alparslan û Selahattîn Eyyûbî quweta xo kenê jû.”
Onca zeliku kenê wertê zimelanê mara. Nê, nê naraye endî ma vatena sima nêkeme, birayenya simarê qannêbeme.
Waxtoke ma tarîx de, tengiye de poşt dê dewleta tirkî, o waxt endî vêrdo ra, peyser nêno. Çike ma endî famkerd ke, waxto ke tirk tengiye ra xeleşiya, na raye vêrê tifongê xo çarneno ma.
Bav û kalê mayê ke seweta Osmanî û tornanê ey dapêro, bi zonayîs ya zî bêzonayîs, marê xiyanet kerd û binê destê tornunê Sultan Alparslan de verdayîme.