Derheqê bira beraatkerdişê sucdarê doza JÎTEMe ya Cizîrî bertek domyenî. Bi taybet zî kesê ke merdimê xo vinî kerdî û bi serran o ke li pey edaletî yî na bire sey konsepta şerî de israrkerdiş a hukimata AKPe vînay. Yew zî kesê ke qezaya Cizîr a Şirnexî de bi destê JÎTEMe ame qetilkerdiş Omer Candoruk ke serra 1994’î de ame kiştiş o. Domanê Candoruk Mesut Candoruk bertek nîşanê bira Dadgeha Giran a Eskîşehîrî da.
Ehlîyeta xo erzeno
Candoruk dergeyîya qalîkerdişê xo de ciresna ke wexto ke pîyê êy ameyo qetilkerdiş, o 7 serre bîyo û wina vat: “Pîyê min aye wext şofêrî kerdênê û nêzdîyê noqtaya BOTAŞe ameyo binçimkerdiş. Wexto ke pîyê min yeno binçimkerdiş, xeylê nasî ci veynenî. Pîyê min dekenî erebeya Torosî mîyan, wexto ke pîyê min dekenî ereba, pîyê min ehlîyeta xo erzeno teber. Kesê nas zî ehlîyeta ci gênî û bade danî ma. Pîyê min hetê 3 tenan ra dewa Xulanî de yeno qetilkerdiş û xora tirmê ci hetê dewijan ra yeno dîyîş. Serranê 90’î de ti averşîyayîş nêbî. Ma serra 2003’î de Amedî de îfade da, la çi heyf ke cipersayîşekî cîddî nêame akerdiş.”
Hedîseyê zelal î
Candoruk qalîkerdişê xo de bal ant ser gêrayîşê înan a edaletî û wina domna: “Serra 2009’î de derheqê Şaredarê kan a Cizîrî Cemal Temîzoz û çend tenan de cipersayîş ame akerdiş. Xora o bi xo zî senî hewa pîyê min û embazanê ci kîşto, vat. Ewil kesê ke dosyaye mîyan de nameyê înan sey limite vîyareno, vanî 21 tenî hetê endamê JÎTEMe ra ameyî kiştiş. La semedê ke gefê tay kesan, îfadeya xo bedilnenî. Bade ke nêy kesî îfadeya xo bedilnenî, xora aye wext dosya zî bedilyay. Derheqê dosyaye de bira beraatî amey girewtiş, na bire bi polîtîkayanê îqtîdarî ra girêdaye ya. Îqtîdar bi xo zî şarî bi Torosan tehdît kerdbî. Heta îqtîdarekî demokrasîya radîkalî bipawo nêro, aye wext edalet edalet zî nîno.”
DÎHA/ŞIRNEX
AKP tîma ‘Torosê Sipî’ heqdar nîşan da
AKP tîma ‘Torosê Sipî’ heqdar nîşan da
Serekê Baroya Amedî Tahîr Elçî bertek nîşanê bi beraatbîyîşê doza JÎTEMe ke 21 tenî awayo hovane ameybî qetilkerdiş da û wina verdewam kerd: “No doz 15-20 serre bêwayîr amey veradayîş û no demî de heme delîlî werte ra amey hawanayîş. Bade cipersayîşek amey akerdiş û tîya de raştî amey ziwan. Ger ke wina dewam bikerdênê, qetil û keyeyê biameynê rî bi rî. La çi heyf ke îqtîdara sîyasî no îxtîmalî werte ra wedarna. Bi hezaran inasar dozî estî, la tena 10-12 hebî dozî amey akerdiş. AKP ‘Torosê Sipî’yan heqdar nîşan da. Ma do dozî bibî Dadgeha berz, Dadgeha Makeqanuna Bingeyî û Dadgeha Heqê Merdiman a Ewropaye.”
ANF/BRUKSEL