Emser serrgêra 40. ya ronîyayîşê Partîya Karkeranê Kurdîstanî (PKK) yo. Çarçewaya serrgêra ronîyayîşî de Warê Pawitişê Medya de tayê aktîvîteyî yenî viraştene û serrgêra ronîyayîşî yena pîrozkerdene.
Aktîvîte bi merasîmê leşkerî dest pêkerd û endamê Komîteya Caardişî ya PKKyî Rûken Garzane û Kasim Engîn, endamê Komîteya Merkezî ya PKKyî Hemrîn Dêrsime, Cemal Şerik, fermandaranê HPG û YJA Starî ra Mîzgîn Goyî, Hezîl Ozgure, Çeknaz Qers û Kawa Garzan zî beşdarê merasîmî bîyî.
Merasîm ra dima Rûken Garzane qisey kerde û dîyar kerde ke ê do bi têkoşînêko gird beyraqa sosyalîzmî serra 41. de bitêşenî. Garzane va ‘wa serra 41. sere de Rayber Apo rê û heme embazanê şehîdan rê pîroz bo’ û wina dewam kerde: “Ma şexsê Hakî Karer, Delal Amede, Zekî Şengalî û Atakanî de heme şehîdan vîr anî û sozê wayîrvejîyayîşî danî.”
PKKyî rolê ciwan û cinîyan nîşan da
Garzane dewamê qiseykerdişê xo de daye zanayene ke PKKyî 40 serran de mîrasêko gird tarîxê Kurdîstanî rê verdayo û wina va: “Rayberîya Rayber Apoyî de gamê tarîxî erzîyayî. Cinîyê kurdan ke rayberîya Îdeolojîyê Rizgarîya Cinîyan kenî, cinîyanê heme dinya rê rayberîye kenî û heme cinîyan rê benî nimune. Cinîyê kurdan eynî wextî de seba komelo seyyewbînan û ehlaqî zî nimune yî. Têkoşînê azadîya cinîyan hertim bi warê têkoşînê bingeyînî yê PKK. PKKyî rolê cinî û ciwanan nîşan da û no het de şaranê dinya rê rayberî keno.”
Ma do mîyanê komployanê ci de ci bifetisnî
Garzane qiseykerdişê xo de wina va: “PKKyo ke vera sîstemê emperyalîzm û kapîtalîstî de şer keno, heqîqeta komelan zî nîşan dano. PKK ke mîyanê 40 serran de vera faşîzmî de beyraqa sosyalîzmî tewr zaf da têşanayene, ewro zî seba bindestan têşaneno û seba bindestan mesajê îrade û cuyêka azade dano. Rayber Apo bi şehîdanê azadîye û şarê welatperwerî seba komelêko seyyewbînan û ehlaqî gamêka girde eşt.”
PKKyî heme komployî veng vetî
Garzane va ‘cok ra dewletê faşîstî vera Rayber Apo û PKKyî de polîtîkayanê înkar û îmha domnenî’ û wina domnaye: “Yeno zanayene ke vîyarteyê têkoşînê azadîye de xeylê komployî virazîyayî û cewabê girdî ameyî dayene. Komploya ke şexsê Rayberê Apoyî de ameye viraştene, ewro zî dewam kena. Rayberîya Amerîka de vera Rayber Apo û qadroyanê PKKyî de hêrişê neweyî dest pêkerdî. Ma zanî ke PKKyî 40 serran de heme komployî veng vetî. PKK do vera nê hêrişan de zî bi eynî qerardarîye têkoşîn bido. Faşîzm û hêzê emperyalîstî do mîyanê komployanê xo de bifetisî. Tevgerê Azadîye do serra 41. de zî beyraqa sosyalîzmî bitêşano. Ma soz danî ke ma do faşîzm biqedênî û cuya azade xelq bikerî. Ma tecrîd wedarnî û zorê faşîzmî bîşêrî û Kurdîstan azade bikerî.”
ANF / BEHDÎNAN