Ez heta 11 serrîya xo dewe de menda. Dima ra ma temamî şiyê bajarê Amedî. Wexto ke ma dewe de bî, mi şiwanê kerdênê. Ez şênê ware. Mi bizan û meşnan ra, bizêk û verekanê ra zaf heskerdênê. Hema hema ma hetanê warê ra amênê dewe, ez warê de mendênê. Warê ma de şiwanê bi dor bî. Yane ciwîyayîşê dewijan ma yê warê bi şirîkî bî. Şiwanî zî bi şirîkayî bênê. Her roj yew keyê şiwanê kerdênê.
Mi ciwîyayîşê waran de zaf çîyê dî. Bizê senî ameyênê weyîkerdiş. Senîn musanê keyê. Dadîya mi her yewê nê karan bi westayî kerdênê. Dadîyê mi zaf rind bizê ma musnênê keyê û xêmê ma. Dadîya mi hina kerdênê. Wexto ke tantir (penîr ro bê runî) viraştênê, awê tantirê kerdênê legen. Kirdkî awê tantir (penîr) ra vanî şujike.Tehme awê şujikê zî zaf tehmêk weş o. Mi zî awê şujikê ra zaf heskerdênê û mi şimitênê. Welatanê rojava ra Swîsre tehme şujike hol ferq kerdo, şujike kerda gazoz û nameyê gazoz zî kerdo Revella.Revella Swîsre de zaf namdar a. Wexto ke ez zî şêrê Swisre, ez Revella şimena. Revella zaf zî yeno rotiş. Dadîyê mi zî tehme şujike hol zanenê û çend bizê ma ayê ke hol şit danê, awê şujikê danê înan. Saetê nêmrojî de yane wextê mexel de danê înan. Bizê hina musenê awê şujikê. Wexto ke saetê nêmrojî amenê, nê bizê ma ça de bibenê wa bibenê, kewtênê vernîyê pêronê biz û meşnayê ardênê ware, cayê mexelê. La înan beh beh kerdênê amenê kewtênê xêm, dadîya mi şujike danê înan. Her roj eynî tewire dewamkerdenê.
Nê rojan de tayî vejîyayî vanê ma “Partîya Şarê Zazayan” awan kenî. Rewşê înan sey bizê ke dadîyê mi şujike danê înan, neyarê şarê Kurd, dewleta tirk şujike (pere, meqem û mewkî) dana înan, dima ra vana bikewrênê vernîyê şarê Kurd, înan berzê damê (feqe/dafike) mi. Ez înan qirbikerî û bikerî tirk. Serkeşîyê înan zî Cevdet Yilmaz o Ramanij û Yucel Barakgazîyê Azij kenî. Vanê kirdî (zaza, kirmanc, dimil) Kurd nîyê. Ser ra zî Engurî (Enqere) de kombîyayîş virazênê û tayî kesê ke eslê xo înkar kenî, înan anî têhet. Înan danî şuxulnayîş, sey bizê şujikê danî beh beh kerdiş. Eyê zî wirzênê vanî, ma yew partî awan kenê. Nameyê partîyê ra zî vanî, “Partîya Şarê Zazayan”. Wazenê hina şarê Kurd letê bikerenê, hêzê şarê Kurd parçe parçe bikerênê, hina rehet qirbikerênê. Planê dewleta tirk û Cevdet Yilmaz înan hina yo.
Ez tena yew çîyê vana, wa şarê Kurd bi taybete ayê Çewlîgî, Cevdet Yilmazî ra pers biker o: "Ti eşîre Ramanî ra yê. Ti vanê ez Kurd nîya. Ramanijê Batmanî vanî ma Kurdî. Senî eyê benî kurd, ti benî tirk?