Planê hêrişî Anqara de virazîya

Parlamentera HDPyî ya Amedî Feleknas Ucaye derheqê hêrişê ke hetê PDKyî ra zîyaretê Mesut Barzanîyî yê Anqara ra dima virazîya de wina va: “Planê hêrişê PDKyî yê Şengalî Anqara de ame viraştiş”

Serekê PDKyî Mesut Barzanî 26ê sibate de amebî Tirkîya û Serekkomar Erdogan û Serekwezîr Yildirimî reyde pêvînayîş viraştbî. Pêvînayîşê Barzanîyî ra dima grûbêka girêdayeyê PDKyî hêrişê Şengalî kerd. Parlamentera HDPyî ya Amedî Feleknas Ucaye babete ser o qisey kerde.Parlamentere Ucaye va ‘planê hêrişê PDKyî yê Şengal Anqara de ame viraştiş’ û wina domnaye: “Hêrişê PDKyî yê Şengalî ra ver zî zext û tedayê Tirkîya estbîy. Erdogan û Yildirimî pêsero pêsero vatêne ‘eke PDK mudaxale nêkero, ma do mudaxale bikerî’. Bi ameyîşê Barzanîyî operasyon ameyo tesdîqkerdiş.”

Ma qebul nêkenî 

Ucaye va ‘ewro her çiqas ke hêrişê hende girdî estî, reyna zî viraştişê Kongreya Neteweyî ya Kurd sey nan û awe muhîm a’ û wina dewam kerde: “Her ke Erdogan û AKP kewenî tengasî veng danî Barzanîyî. Hem operasyonê Cerablus û hem zî Şengalî ra ver Barzanî ame Tirkîya. No zî nîşanê ma dano ke mabênê înan de peymanê înan yê nimite estî. No zî seba menfîetê şarê Kurdistanî nîyo, menfîetê PDK û AKP yo. Vera hêrişan de vindetişê cinîyanê êzidî zaf muhîm o. Ma xoverdayîşê cinîyanê êzidîyan zaf bierj vînenî.”

Ganî kom bibî 

Ucaye dewamê qiseykerdişê xo de va ‘şarê kurd do îxanetkaran qet xo vîr ra nêkero’ û wina dewam kerde: “Ma Şêx Seîd, Seyîd Riza, Mehmet Tunç, Sakîne Cansize û sewbîna qetlîyaman xo vîr ra nêkerd. Şarê êzidî çîyo ke PDKyî kerd do qet xo vîr ra nêkero. Wazenî bi girewtişê Şengalî Rojawanî ser de zî hêrişan bikerî. Reyna dormeyê Mexmur û Qendîlî de zî çeteyî kom bîyî û hewl danî hêrişan bikerî. AKP hewl dana propagandaya xo kurdan ser de bikero, PDK zî beno haletê nê polîtîkayî. Şengal namûsê Kurdistanî yo, ganî her kes dormeyê Şengal de kom bibo.”